Abezobunhloli bebelelephi kwenzeka konke lokhu?
NGOMSOMBULUKO leli phephandaba lishicilele umbono ogxeka ukudlanga kwemibhikisho enodlame ezweni, laphakamisa ukuthi uhulumeni nezinhlaka ezizimele benze imizamo yokunqanda lesi sihlava.
Leli phephandaba libalule lapha ukucekelwa phansi kwempahla eMoses Mabhida Stadium - ngokuthiwa bangabalandeli beKaizer Chiefs - nomonakalo owenziwe ngababhikishi esifundazweni iNorth West. Kube wukuqondana kwezinto nje ukuthi lo mbono uthi ubhalwa ngempelasonto, izigilamkhuba zibe zihlela ukwenza umonakalo osabekayo emgwaqweni owuthelawayeka uN3, eMooi River Toll Plaza, lapho zishise amaloli athwala impahla abalelwa ku-23 - zazitapela nempahla ebithwelwe ngamanye ala maloli.
Ezinye zalezi zithuthi ezishisiwe, bezithwele izimoto zentengo ephezulu, okwenze omonakalo wabalelwa ku-R300 million. Izinswelaboya zigadle ngeSonto ebusuku, zavala lo mgwaqo ongomunye webaluleke kakhulu emnothweni wezwe namazwe angomakhelwane okubalwa iZimbabwe neZambia ngoba usetshenziswa ngamaloli athutha impahla esuka echwebeni laseThekwini, iqhamuka emazweni aphesheya kwezilwandle.
Lokhu kwenzeke ngesikhathi sempelasonto ende, lapho lo mgwaqo ubunesiminyaminya sezimoto zezivakashi ngenxa yamaholide.
Kuzokhumbuleka ukuthi lobu bugebengu kabuqali. Ngempelasonto yePhasika ebelimhla ka-30 kuMashi, kwenzeka isigameko esifanayo, kwashiswa amaloli, kwantshontshwa nempahla abeyithwele. Umbuzo manje uthi njengoba bekunezinsolo vele ukuthi izigangi zingase zikuphinde ezikwenze ngePhasika, kungani abomthetho bengathathanga izinyathelo ezinqala, kuhlanganisa lapha nokuphaka amaphoyisa ezokuphepha komphakathi engeziwe eMooi River Toll Plaza nakwezinye izingxenye zalo mgwaqo, ukuqinisekisa ukuphepha komphakathi.
Amaphoyisa aseNingizimu Afrika anophiko lwezobunhloli olubizwa ngeCrime Intelligence, umsebenzi walo okuwukuhosha umoya, luthole ulwazi ngobugebengu obuhlelwayo.
Kungani lolu phiko lungawenzanga umsebenzi walo ukuthola ukuthi kunobugebengu obuzokwenziwa eMooi River?
Njengoba sesishilo, lo mgwaqo, uN3, ufana nomthambo wegazi omkhulu empilweni yomuntu ngendlela obaluleke ngayo emnothweni wezwe ngakho udinga ukuvikelwa ukuze kuvikeleke umnotho wezwe. Sethemba ukuthi lezi zigameko ezimbili ezenzekile kulo mgwaqo zizoba yisifundo kulabo abangawenzanga umsebenzi wabo ukunqanda inhlekelele eyenzekile.
Labo ababoshiwe ngokucekela phansi impahla nokweba kula maloli, bafanelwe yizijeziso zomthetho ezinzima ukuze babe yisibonelo nakwabanye abahlela ukwenza ubugebengu obufanayo.
Lokhu kubalulekile ngoba uma kungenziwa lutho ukukhalima lesi sihlava, leli lizwe lizogcina lingabuseki, kuthi noma ngubani nje, azenzele umathanda.
Uhulumeni ukhethwa ngabantu ukuba ulawule izwe; uphi kanti lo hulumeni owakhethwa ukuba uphathe izwe, uvikele nabalakhele ezigebengwini?