YEKANI UKUMONELA UZUMA NEJONGOSI LAKHE
LEZI zishimane ezigxeka uJacob Zuma ngokuqonywa yijongosi elineminyaka engamashumi amabili nane, zenziwa wumona ngoba zona zishimile. Nemijendevu nayo isiyingene ngomkhono nesiphanga sengathi uMsholozi wenze elikhulu icala leli.
Kuthiwa umona uqala esweni. Phela uMsholozi yisoka lamanyala, uyamuzwa nje nawe noma ekhuluma, ulimi luyashelela. Ungikhumbuza ikhehla elingizalayo, lona elathi liphume nethimba beyokhulumela enye insizwa thizeni eBhobhoyi, intombi yala yaphetha uma ibona le nsizwa ababeyoyikhulumela, yathi: “Uma bekuyilo baba bengizovuma, kodwa hhayi lo bhuti.”
Yayisho ikhomba ikhehla lami. Phela izinsizwa ezazesaba izintombi zazize zisizwe ngamakhehla uma sekubonakala ukuthi zizoguga zingenabafazi. Nemijendevu ngokunjalo yayibanjelwa ikhehla, ishadiswe ngoba nakhu isigugela ekhaya ingendanga.
Isalukazi esingizalayo, uMaDlamini, sasike sisixoxele - uma seneme - ngamatshitshi namajongosi esasiwaphebeza ngezithebe nga- pha nangapha efuna ukusithathela ikhehla laso.
Phela indoda ekwazi ukuhlanganisa isithembu iyahlonishwa ngoba abesifazane bathanda ukuzishaya izifuba ngamadoda abo bengabangiswa muntu. Iningi lamadoda lesaba nje nokusihlongoza isithembu hleze lishaywe ngedivosi, kanti amanye ashaywa ngebhulumasi ebusweni.
Phela uMsholozi uphila impilo efiswa yiningi lamadoda, yingakho kuvuka umona njalo uma andisa isithembu sakhe. Ngikhumbula ukuthi umsunguli wephephabhuku iPlayboy, uHugh Heffner, bamgxeka waze waya ethuneni ngoba nje naye wayethanda ezincane futhi ezigcwalisa isithabathaba sakhe sodumo ebesaziwa ngePlayboy Mansion le kwelaseMelika.
UMsholozi ubavale izinyeke labo ababethi uheha isifazane ngesikhundla sakhe sobumengameli. Abanye babethi usebenzisa uvelabahleke, kanti mina ngithi unguvelabahleke yena msalofu. Kusho ukuthi uyakwazi ukuphatha abesifazane uma ekwazi ukugcina amakhosikazi asashiselwa yigazi ejabulile futhi engaxabani.
Mangaki amadoda angakusho lokhu ngoba phela abaningi behlulwa ngumfazi oyedwa vo? Omunye umphuzi wotshwala othanda ukuphuza ezindaweni ezicokeme, uMzondeni, uthi abesifazane bathanda uMsholozi ngoba engakwazi ukubala imali eningi, ngakho bazokwazi ukumxhopha ngoshintshi uma bebuya ukuyothenga eDubai.
Uzothi uma ebuza ukuthi basebenzise malini, bamane bambhalele yona epheshaneni bese ehluleka wukuyifunda, kodwa-ke ngicabanga ukuthi besekukhuluma utshwala. Lawa makhehla okuthiwa ngama- blesser athuke ayazichamela phela ngoba nakhu uMsholozi usedlalela enkundleni yawo.
Kulezi zinsuku uma uMsholozi eqala iculo lakhe adume ngalo, sonke siyokwazi kahle kamhlophe ukuthi usekhuluma ngamuphi umshini, kanti namayelobhon’zi azombheka ukuthi isinqe sitshikiza kanjani bese ethi nawo ayawufuna lo mshini wakhe. Imijendevu ayivele ikhohlwe ngoba kubonakala sengathi uMsholozi uyehla ngezinombolo, akenyuki.
Amathuba ezintombi esezimnkantsh’ ubomvu okukitazwa yilo yamshini wodumo aseshabalele. EMelika kunomagriza oneminyaka engu-72 oshade nomfanyana oneminyaka ewu-19 kula masonto nje ambalwa edlule kanti nomculi wodumo wakuleliya osashona, u-Aaliyah, washo engomeni yakhe yodumo wathi kwezothando iminyaka yizinombolo nje ezingathi shu.
Uma kukhulunywa ngamasoka amanyala, uMsholozi uwahola phambili, kanti usehamba yedwa.
Thina sikhule esekhona amasoka ayeqonywe yizintombi ngazintathu esigodini esisodwa futhi zazana kodwa zingalwi. Ubushimane bufike nemfundiso yabelungu. Abashimile mababhekane nobushimane babo, behlukane noMsholozi. Masicule sonke-ke sithi, “mshini wami, mshini wami…”
Azombheka ukuthi isinqe sakhe sitshikiza kanjani bese nawo eyawufuna...