Bakhala ngamaphoyisa abeSikebhe
Bathi anesandla ekubhebhethekeni kobugebengu
AKHALA ngamaphoyisa aKwaMsane, eMtubatuba amalungu eSikebhe akule ndawo - okuyinhlangano yomphakathi elwa nobugebengu - emuva kokuboshwa kwawo ngoba esolwa ngokushaya owesilisa (50) obesolwa ngokudlwengula owesifazane (36).
Kubikwa ukuthi amalungu amathathu ale nhlangano egxile ekulweni nokwebiwa kwemfuyo, aboshiwe ngeledlule. Kuthiwa lona wesilisa - esingeke silidalule igama gama lakhe - uboshiwe kodwa wadedelwa ngenxa yokungatholakali kobufakazi.
Ngokuthola kweLANGA, lona wesilisa ubuye lapho wesabisa isisulu, naso esingeke sisidalule ukusivikela, okuyinto okuthiwa kayehlanga kahle emndenini.
Umndeni wesisulu uhambe wa- yobikela amalungu eSikebhe ukuze ezongenelela. Eselandiwe, lona wesilisa kuthiwa uqale waphika ukuthi usisabisile isisulu, okuyilapho-ke etitinywe khona waze waziculela ukuthi ukwenzile lokhu.
UMnu Mbekiseni Mbatha ongumxhumanisi weSikebhe eMtubatuba, uthe: “Lo muntu uqale waphika ukuthi usisabisile isisulu futhi usidlwengulile kodwa emuva kokuxinwa ngemibuzo, wavuma ukuthi ukwenzile konke lokhu, wathembisa ukuthi uzohamba ayoxolisa ento- mbazaneni nasemndenini wayo.
“Kuliqiniso ukuthi uke wakitazwa kancane ngesikhathi ephoswa imibuzo ngoba ubephika yize bebukhona ubufakazi bokuthi ukwenzile lokhu. Le nto isicasula kakhulu ngoba lo muntu ukhishwa nje, ngisho umndeni wentombazane kawukaze ubizwe ukuyothula ubufakazi, kawukaze waziswe lutho kodwa ubulokhu utshelwa ukuthi mawuxhumane nomseshi naye obengawusizi ngalutho.
“Lokhu kukodwa kwenze umndeni weza kithina njengoba lo mlisa ubeseqalile ukwesabisa le ntombazane,” kusho uMnu Mbatha.
Uthi lona wesilisa ugijime waya emaphoyiseni wayovula icala ngoba ethi ushaywe walinyazwa kwabe sekuboshwa amalungu abo. Utshele ILANGA ukuthi sekujwayelekile ukuthi amaphoyisa akule ndawo angawenzi umsebenzi wawo okugcina kuholele ekubeni abantu baye eSikebheni njengenhlangano elwa nobugebengu, beyocela usizo.
Uthi abasuke bekwenza bona njengenhlangano wukusiza umphakathi kodwa kugcine kuboshwa bona ekubeni amaphoyisa engabasizi ngalutho abantu.
“Ziningi izigameko engingazibala lapho kugcine kuboshwa amalungu ethu kodwa sibe sisiza umphakathi. Iningi lezigilamkhuba liyakhishwa enkantolo ngenxa yabaseshi abangawenzi umsebenzi namaphoyisa abhala izitatimende ezingekho, ezigcina zenze ukuthi amacala ahoxe enkantolo.
“Yingakho sithi amaphoyisa alapha nawo anesandla kulokhu kubhebhetheka kobugebengu. Uma abantu emphakathini beza kithina ngenhloso yokuzocela usizo, kasikwazi ukubajikisa. Kumele singenelele kodwa ekugcineni amaphoyisa abopha thina,” kusho uMnu Mbatha.
Okhulumela amaphoyisa KwaZulu-Natal, uLt Colonel Thulani Zwane, uthi kuboshwe abasolwa abathathu ngecala lokuthumba nelokushaya ngenhloso yokulimaza, badedelwe ngebheyili ka-R800 umuntu ngamunye yiNkantolo yeMantshi yaseMtubatuba.
Uthi kusalindeleke ukuba kuboshwe abanye abasolwa ngalawa macala. Uphinde waliqinisekisa icala lokudlwengulwa kowesifazane oneminyaka ewu-36.
Ziningi izigameko engingazibala lapho kugcine kuboshwa amalungu ethu...