BAVALE UMGWAQO BEFUNA KUDEDELWE ABASOLWA
KUSUKE isidididi izolo eNdwedwe, umphakathi ubhikisha uvala ugwaqo ongenela kule ndawo, ufuna kudedelwe abasolwa abawu-8 ababoshwe ngoMsombuluko kade kunombhikisho. Lo mphakathi ububhikisha ufuna ukwakhelwa izinciphisasivinini nokufakelwa itiyela kwezinye izingxenye zale ndawo.
Ubukhala ngokuthi sebabaningi abantu abashona kulo mgwaqo beshayiswa yizimoto. Kulo mbhikisho kuboshwe uMnu Siyabonga Cele (43), uMnu Mthunzi Gumbi (39), uNkz Phumelele Mpanza (38), uMnu Moses Gumbi (42), uNkz Winile Mnyandu (35), uMnu Msawenkosi Gina (29), uMnu Bongumusa Ngcobo (39) noMnu Samson Mlambo (26). Bavele kafushane eNkantolo yeMantshi yaseNdwendwe izolo.
Ngesikhathi bevela enkantolo, abawu-5 bacele ukuzimela kanti abathathu bona bacele ummeli wakwaLegal Aid. Le nkantolo ibingcwele ichichima amalungu omphakathi efuna ukuyozizwela umphumela wecala.
Kwenzeka lokhu nje, amanye amalungu omphakathi abematasa evala imigwaqo engenela eNdwedwe, okuwuP100 nomunye owubhuqu ongenela khona eNdwedwe. Kudingeke ukuba zikhishwe izingane zezikole eziseduze nale ndawo ngenxa yokubhekelela ukuphepha kwazo.
Ngesikhathi amanye amalungu omphakathi evala imigwaqo, abethi ngeke ayeke ukubhikisha kuze kube kudedelwa abasolwa kuphi- nde kulalelwe izikhalo zawo.
Izigodi ezithintwe yilo mbikisho yiMpungeni neMahhekeni ngaphansi kuka-ward 15. Umphakathi wakule ndawo ukhala kakhulu ngokuthi sekukaningi ucela ukufakelwa izinciphisasivinini kodwa iziphathimandla zizithela ngabandayo.
Usole iMeya yaseNdwedwe, uMnu Nathi Chili, ngokuwubukela phansi njengoba uthi embizweni ebingesonto eledlule ibukise ngawo yathi ngeke ulalelwe ngoba kawufundile.
ILANGA lithole ukuthi phambilini uMnyango wezokuThutha KwaZulu-Natal, ubuthembise ukuthi uzobuyela emphakathini ezinsukwini eziwu-14 mayelana nodaba lwezinciphisasivinini kodwa umphakathi wakhetha ukubhikisha ngoba ucasulwa yinkulumo yemeya zingakapheli lezi zinsuku.
Ikhansela lakule ndawo, uMnu Phumelela Shezi, lithi ikhona incwadi eliyibhalele umnyango kanti belisalinde impendulo kuwona.
“Okubuhlungu wukuthi sekuboshwe nabantu abangenzanga lutho. Ngokombiko engiwutholile, abantu babelandwa emakhaya abo abanye bedutshulwa. Lokhu kuyangidida ngoba abanye babo bebengekho ngoMsombuluko ngesikhathi kubhikishwa.
“Njengamanje siyazama ukuncenga umphakathi ukuba wehlise imimoya kodwa kunzima njengoba kukhona abasagqunywe ejele nje,” kusho uMnu Shezi. Imantshi uMnu Fikile Luvuno, icala ilihlehlisele uLwesibili, ukuze abasolwa bezofaka isicelo sebheyili.
Okhulumela uMnyango wezokuThutha KwaZulu-Natal, uMnu Kwanele Ncalane, uthe likhona ithimba elijutshwe ukuyocubungula izikhalo zalo mphakathi, okuhlanganisa nokubheka ukuthi izinciphisasivinini zidingeka ngokushesha yini.
Uthe bazobe sebebuyela emphakathini uma sekubuye umbiko ogcwele. Ube esenxusa umphakathi ukuba ugweme ukulimaza noma ukuvala imigwaqo uma unezikhalo kodwa kuhlalwe phansi kuboniswane. Imizamo ukuthola imeya iphunzile njengoba ucingo lwayo beluvaliwe.