KUSHAYWE INDODA NAMADODAKAZI KUBANGWA INSIMU YOMOBA ENDWEDWE
KUWUPHINDILE lokho umndeni wakwaMvubu, eNdwedwe, kushaywa ubaba wakhona ehlanganiswa namadodakazi akhe, okuthiwa bashaywe yizinduna zeNkosi u-Advocate Ngcobo, ngoMsombuluko. Kuzokhumbuleka ukuthi ezinyangeni ezimbili zedlule ILANGA like labika ngesigameko sokushaywa kukaMnu Mzokhona Mvubu, kubangwa indaba yokulima insimu yomoba.
UMnu Mvubu, kuthiwa ushaywe namadodakazi akhe, uPrecious noNonhlanhla kade beyobuza indaba yokumiswa kwakhe (uMnu Mvubu) eku-limeni insimu abeselinde inkokhelo ngokuyilima kwabakwaTongaat Hullets. Bebeyobuza enkosini nje, yingoba besebezwe ukuthi le nsi-mu isilinywa ngomunye umuntu.
Ngokuthola kweLANGA ngoNkk Ntombi Mvubu, umyeni wakhe namadodakazi bathe befika enkantolo yenkosi behamba ngogandaganda, izinduna zavele zabatheleke- la ngenduku. Zibabuze ukuthi benziwa yini bangayihloniphi inkosi baze bayoyihlasela enkantolo yayo.
“Bathe bayachaza kwanhlanga zimuka nomoya, bashaywa. Omakhalekhukhwini abebebaphethe balahleke lapho sebebaleka. Namanje ucingo lukaNonhlanhla kalukatholakali. Bathe befika lapha ekhaya amaphoyisa afike azobashaqa bobathathu baboshwa.
“Nasekuqaleni uMvubu, eshaywe yinkosi, kwavele kwathuleka amaphoyisa enqaba ukuyoyibopha ethi kayiboshwa inkosi,” kusho uNkk Mvubu.
Lo mbango wensimu osekuze kwaboshwa abantu ngawo, yindawo eseNkumbanyuswa, khona eNdwendwe. Phambilini ibingaphansi kweNkosi Sifiso Ngcobo, kuthe uma sekuklanywa kabusha imingcele yabuyela enkosini yakwaMavela (iNkosi Advocate Ngcobo).
UMnu Mvubu, ngaphambi kokuthi aboshwe, utshele ILANGA ukuthi indawo abeyilima ngekaNkk Bongi Nyuswa kodwa ubeseyiqashisela abakwaTongaat Hullets, ukuba bayisebenzise bese yena ethola inkokhelo ngalokho.
Uthi yena njengomlimi bekuzothi uma eseqedile ukuyilima bese ehambisa amaphepha enkokhelo kwabakwaTongaat Hullets ngomsebenzi asewenzile, bafike bazoyihlola bese bemkhokhela ngalokho. Ithintwa iNkosi uNgcobo icele ILANGA ukuba lihlukane nayo phansi ngoba kalihlanganise lutho nalalu daba.
“Lalela wentombazane, awuhlukane nami phansi,” isho igaklaza ucingo. Kudlule imizuzwana yafonela leli phephandaba ibuzisisa ukuthi ngubani lona owenza udaba. Kuthe uma itshelwa, yavusa ukuthi ILANGA like laya emhlabeni wayo lacela ukukhuluma nayo phambi kwezinduna zayo.
Ithe lokhu bekukhombisa ukwedelela njengoba ithi bekufanele licele ukuya emhlabeni wayo, lingavele ligulugudele nje.
Okhulumela amaphoyisa KwaZulu-Natal, uLt Colonel Thulani Zwane, usiqinisekisile isigameko sokuboshwa kwamalungu amathathu omndeni wakwaMvubu.
Uthi baboshelwe icala lokungena ngokungemthetho enkantolo yenkosi. Bavelile namhlanje eNkantolo yeMantshi yaseNdwedwe kodwa icala labo lahlehliselwa uJuni. Bathole ibheyili ka-R1 000 umuntu ngamunye.
Bathe bayachaza kwanhlanga zimuka nomoya, bashaywa...