I-SHARKS NEQHINGA LOKUZIKHAMA UMOYA IZITHA
IZOLWELA ukugcina ibhola kuyona iCell C Sharks emdlalweni neHighlanders yaseNew Zealand weVodacom Super Rugby ozokuba ngoMgqibelo ngo-19h15 eJonsson Kings Park Stadium, eThekwini.
UJuan Schoeman oyi- prop yeSharks, ukholwa wukuthi bangakwazi ukuthola umphumela omuhle kulo mdlalo uma bezoyincisha ibhola iHighlanders ehambela phezulu njengoba ngeledlule ikwaze ukuguqisa iBulls ngo29-28 isesibayeni sayo eLoftus Versveld Stadium, ePretoria.
Lo mdlali usegijime imidlalo eminingi kule sizini eyibambe endaweni kaTendai “Beast” Mtawarira obelimele.
“Kwenzeka okungajwayelekile emqhudelwaneni wanonyaka weSuper Rugby njengoba amaqembu edlala ngendlela engafani umdlalo nomdlalo. Iqembu lifike libe mandla namuhla kusasa selithwele kanzima.
"Okumqoka kulo mdlalo wukuba sigcine ibhola kithina, ingalitholi kalula iHighlanders ukuzenzela umathanda ngalo,” kusho uSchoeman.
ISharks kulindeleke ukuba ifike kulo mdlalo inamacebo amahle kwazise iyibuke kahle iHighlanders njengoba ezikaRobert du Preez Snr beziphumule ngele- dlule.
Isiyonke imidlalo yeVodacom Super Rugby engempelasonto imi kanjena:KUSASA NGOLWESIHLANU ERotorua International Stadium: Chiefs vs Jaguares 9h35 (SS1).
E-AAMI Park: Rebels vs Crusaders 11h45 (SS1). NGOMGQIBELO EWestpac Stadium: Hurricanes vs Emirates Lions 9h35 (SS1).
EBrookvale Oval: Waratahs vs Blues 11h45 (SS1).
EDHL Newlands: DHL Stormers vs Vodacom Bulls 15h05 (SS1).
EJonsson Kings Park Stadium: Cell C Sharks vs Highlanders 19h15 (SS1).