Ifakwe endalini ikilabhu yaKwaZulu-Natal
Izikhulu sezifuna ukugxila ekukhuliseni amabhizinisi
BANQUME ukuyifaka endalini iDurban FC abanikazi bale kilabhu egijima kwiSouth African Football Association (Safa) KwaZulu-Natal ABC Motsepe League.
Sekuwumlando ukuthi le kilabhu ifudukele KwaZulu-Natal emuva kokuthenga ilungelo leBlackburn Rovers yase-Eastern Cape lokudlala kwiNational First Division (NFD) kumasizini ambalwa adlule. Nokho igencwe yizembe kwiNFD.
UGian Chidoni ongomunye wabanikazi beDurban FC, utshele ILANGA ukuthi sebeyifake endalini le kilabhu ngenxa yokuxinwa ngamanye amabhizinisi.
Uthi uma kwenzeka bengamtholi umuntu ozothenga ikilabhu, bazophoqeleka ukuqhubeka nayo nangesizini ezayo.
UChidoni uthe: “Siyalithanda ibhola kodwa uma izinto zingenzeki kakukho esingakwenza. Kasidayisi ngoba sinenkinga yemali, wukuthi sifuna ukugxila kwelinye lamabhizinisi esisalifukula.”
Uthe bakhona asebeke bamthinta ngokudayiselana yize kungekho asebevumelene ngakho futhi kabanalo usuku olunguqu.
Leli phephandaba lihabule ukuthi zikhona izikhulu ezizinze eThekwini ezingase zihlabane ngelungelo leDurban FC nokho okwamanje lezi zikhulu kazifuni ukuphumela obala konke kungakophothulwa ngokusemthethweni neDurban FC.
Le kilabhu iqede isizini yeMotsepe League isendaweni enhle futhi okuhle ngayo wukuba nengqalasizinda okubalwa ibhasi nenkundla yokuzilolongela okuwumsebenzi omuncane kubanikazi abazothenga.
Kulabo abafuna ukuthola imininigwane ethe thuthu bangamubhalela ubhalonyazi oluthi: gian@ durbanfc.com