Wenza isethembiso umqeqeshi weBucs
Uthi abalandeli nakanjani bazojabula ngesizini ezayo
UTHEMBISA lukhulu uMilutin “Micho” Sredojevic ongumqeqeshi we-Orlando Pirates emuva kokuba ezakhe zihluleke zancama ukukhava iMamelodi Sundowns esiyizingqwele ezintsha ze-Absa Premiership.
IBucs izosonga le sizini neFree State Stars kowe-Absa Premiership ngoMgqibelo mhla zili-12 kwephezulu e-Orlando Stadium, eSoweto. IBucs izosonga le sizini ilambatha njengoba ingazange inqobe nkomishi. Nokho iziduduza ngokuthi iyabuyela emidlalweni yeCaf Champions League njengoba izoqeda isizini ilele isibili kwi- log.
USredojevic wenza isethembiso kubalandeli bale kilabhu.
“Indlela esibuye ngayo ngomzuliswano wesibili kufanele ibethuse abantu ngoba yiyona ndlela esizoqa- la ngayo isizini ezayo.
Ngifuna ukuthembisa abalandeli bethu ukuthi noma kanjani ngesizini ezayo ikhona inkomishi esizoyinqoba, ukuthi iyiphi angikakazi.
“Sibe nesizini enhle kakhulu. Sizamile ukubuyisa isithunzi sekilabhu.
"Ngesizini ezayo abantu bazobhema bakholwe,” kusho uSredojevic ojoyine le kilabhu ngokuqala kwesizini isiyinhlekisa njengoba ibiwukudla kwesibhaxu.
Ngokuyodlala kwiCaf Champions League, uthe: “Ngokwami ngingumAfrika, impilo yami cishe yonke yokuqeqesha bengilapha e-Afrika. Ngijabule ngendlela engachazeki ukuthi siyodlala kule midlalo yeCaf.
"Kodwa-ke kufanele siqinise isikwati sethu njengoba sesiya kule midlalo ngoba sizodinga izinsizwa, akudlalwa laphayana kunzima.”