Sezikhonjwa ngeSonto izimpi ezibhuntshile
Kuzovulwa ngezimpi zama-amesha
ISIKHONJWA osukwini lwangeSonto impi ye-International Boxing Federation (IBF) All Africa Junior Featherweight phakathi kuka-Innocent “Tycoon” Mantengu ( osesithombeni) oyingqwele yaleli bhande noDoctor Nsele.
Le mpi bekumele ibe ngeledlule kodwa yahlehliswa ngenxa yokuthi imali ewumthetho yeBoxing South Africa (BSA), kayifakwanga ngesikhathi esinqunyiwe. Le mpi izokuba ngeSonto KwaMsane Hall, eMtubatuba. Kuzoqala izimpi zamaamesha ngo-9 ekuseni bese kuthi ezesigaba esikhokhelayo ziqale ngo-13h00. Kuzongenwa mahhala.
Ukuqhubeka kwalezi zimpi kuqinisekiswe nguThulani “Nkunzi” Magudulela weLudonga Boxing Promotions.
“Siphoqelekile ngeledlule ukuba siyihlehlise impi ngenxa yokuthi iBSA ibidinga imali ukuze kukhokhelwe izindleko zabaphathi bempi. Omunye ngowaseKenya kanti omunye ngowaseTanzania. Besicele ukuba iBSA ikhokhe bese siyinika imali kamuva, kanti nabaxhasi abebezoyifaka bebeyibhalile incwadi eqinisekisa lokhu.
“Lolu hlelo lubuye lwabhuntsha ngenxa yokuthi luthinta nabantu bangaphandle. Kumanje ngiseMtubatuba ngiphothula amalungiselelo empi. Izimpi zizoqhubeka ngeSonto, ngakho-ke umphakathi waseMtubatuba namaphethelo awuze ngobuningi,” kusho uMagu- dulela.
UMthobisi Mack Makhathini okhulumela uBongi SitholeMoloi onguNgqongqoshe WezeMidlalo KwaZulu-Natal, ukuqinisekisile ukuthi lezi zimpi zizokuba ngeSonto.
Lo mnyango uyingxenye yalezi zimpi ngenxa yokuthi zididiyela nezama-amesha okuhloswe ngazo ukuthuthukisa amabhokisa aseMtubatuba. Lo mqhudelwano wesekwe nawumasipala waseMtubatuba.
UMantengu utshele ILANGA izolo ngoLwesithathu ukuthi ziphazamisekile izinhlelo zakhe ngokuhlehliswa kwalo mqhudelwano.
Uthe usebenza kanzima kuleli sonto ukulungisa isisindo sakhe njengoba ephazamisekile ngeledlule. Ubonge kakhulu umnyango wezemidlalo, umasipala waseMtubatuba noMagudulela ngokuqinisekisa ukuthi liyafezeka iphupho lakhe lokulwela ngakubo.
Leli bhokisa lizofika ngoMgqibelo eMtubatuba lizokalwa isisindo.