IZINXUSHUNXUSHU KWEYE-KZN SAB LEAGUE
SEZIKHISHIWE izinsuku okuzosingathwa ngazo imidlalo yeSAB League yokuhlunga amakilabhu amabili aKwaZulu-Natal azokhushulelwa kwiSouth African Football Association (Safa) KZN ABC Motsepe League.
Le midlalo izoqala mhla lulunye isongwe mhla zintathu kuNhlangulana (June) eZululand. Nokho-ke iSafa esifundazweni kayikasho ukuthi izokuba kuphi neZululand njengoba lesi sifunda sisikhulu.
UKwenzakwakhe Ngwenya wemiqhudelwano yeSafa esifundazweni, uthe basalinde ubuholi beSafa eZululand ukubanika indawo ezosingatha imidlalo. Uphinde wathi basalinde ubuholi bukazwelonke ukucacisa ngesifundazwe esizosingatha imidlalo kazwelonke yeSAB League.
UNgwenya ukugcizelele ukuthi emidlalweni yokuhlunga yesifundazwe, iTheku lizomelwa ngamakilabhu adlala ngaphansi kwakhe. Ngakolunye uhlangothi, iSafa eThekwini yaseHoy Park, eholwa ngu-Alpha Mchunu, isanda kuthi yiyona ezokhipha ikilabhu yesifundazwe ezomela iTheku emidlalweni yokuhlunga.
U-Eric Smith oyisekela likaMchunu, uthe i-Ethekwini Football Tournament ebingeledlule izosetshenziselwa ukubheka abadlali abazohlungelwa ukumela isifundazwe emidlalweni kazwelonke.
Lokhu kusidweba sicace isithombe sokuthi kuzokuba nezinxushunxushu nxa lesi sifunda sekumele siyodlala imidlalo yokuhlunga.
Kule sizini iMotsepe League idlala ngamakilabhu angaphelele ngenxa yokuthi kayiphelanga imidlalo yokuhlunga yeSAB League obekudalwe yizinkinga zeSafa eThekwini. Kugcine kunyuswe ikilabhu eyodwa esikhundleni samabili ngenxa yezinkinga zaseThekwini ebelikhiphe amakilabhu amabili kweyokuhlunga. Obunye ubuholi buzinze eCurries Fountain ngaphansi kukaMazwi Mkhize wodumo ebholeni lezikole.