Unozinti weDowns ubonga uMicho
U-Onyango akakuboni okuyomhlukanisa nomqeqeshi wePirates
UDENIS Onyango ongunozinti wokuqina weMamelodi Sundowns ubonga uyanconcoza kuMilutin “Micho” Sredojevic ongumlolongi we-Orlando Pirates ngokumkhalima nokumkhulisa ebhekene nobunzima nenhlupheko e-Uganda.
Ekhuluma neLANGA ngoLwesibili emini engcebeleka nomndeni wakhe eSun City, eNorth West, u-Onyango (32) uthe ulapho ekhona nje ngoMicho.
Uthi wabonwa yilo mqeqeshi esemncane esafunda eCitizen High School, e-Uganda, wamusa e-Ethiopia ukuyodlalela iSaint George.
Ngaleso sikhathi uMicho ubecija iSaint George ayijoyine ngesizini ka-2004/2005 wanqoba nayo iligi, waphinda wayivikela ngo2005/06.
UMicho uyishile le kilabhu ngeka-2006/07 kodwa washaya ibuya ngelandelayo ka-2007/2008 waphinda wanqoba iligi. U-Onyango uthi lo mqeqeshi umkhulisile ngeziyalo ezinhle, waba yindoda.
Lo mdlali ubonwe yiSuperSport United egijima e-Ethiopia kanti usuke kuyona esethathwa yiMamelodi Sundowns asezuze okuningi kuyona.
U-Onyango uthe: “UMicho wangibona ukuthi nginekhono lokudlala ibhola ngisemncane kakhulu.
"Ngimbonga kakhulu ngoku- ngakha. Ufana nobaba wesibili kimina. Ukwazi ukungifaka ugqozi ngisho sengithwele kanzima, angikhuthaze.
"Sisuka kude kakhulu naye nebhola futhi sisaxhumana namanje. Kangiboni ukuthi kukhona okungasehlukanisa naye kwazise ungifundise okuningi empilweni.
“Ungichushise ukubhekana nezinkinga eziningi engizifice ebholeni.
"Ngikhumbula ngesikhathi ngiseqiwa yijezi ngisafika eMzansi, ubehlale ngaso sonke isikhathi engikhuthaza ukusebenza kanzima.
"Ungisuse nenkungu ebisemehlweni ami ngezinselelo zempilo. Ukuba ubengekho uMicho kangiboni ukuthi ngabe ngikwazile ukufinyelela kuleli zinga esengikulona.
"Ubengifanisa nendodana yakhe. Kangisoze ngamlibala.”
Uphethe ngokuthi uyaziqhenya ngasekuzuzile ebholeni laseNingizimu Afrika njengoba enqobe isicoco se-Absa Premiership amahlandla amathathu elandelana neSuperSport United, waba yingxenye yomlando iMamelodi Sundowns idla ubhedu kwiCaf Champions League ngo-2016 neCaf Super Cup ngo-2017.
Qaphela! Thola ingxoxo ekhethekile ngempilo yangasese ka-Onyango engosini iNgaphandle kweNkundla kwiLANGA
Imbila yaswela umsila ngokuyalezela!