I-SUNDOWNS ISABAMBELE I-CASABLANCA IGQUBU
UDENIS Onyango ongunozinti wokuqina weMamelodi Sundowns usayibambele igqubu iWydad Casablanca yaseMorocco abazobhekana nayo emdlalweni wala makilabhu wokuqala kwiGroup C esigabeni samaqoqo eCaf Champions League ngoMgqibelo ngo-21h00 eLucas Moripe Stadium, ePretoria.
La makilabhu azotholana phezulu nje, iDowns isanesilonda esibhibhayo ngokukhishwa yiCasablanca ngo-32 sekukhahlelwa amaphenathi kwi- quarter-final yalo mqhudelwano nyakenye.
ICasablanca yiyona evikela lesi sicoco esinqobe ihlula i-Al Ahly yaseEgypt ngo-1-0 kowamanqamu.
ICasablanca iphuce iqatha emlonyeni iSundowns ngokuyikhipha kulo mqhudelwano kwazise ezikaPitso “Jingles” Mosimane bezizimisele ngokuba yikilabhu yokuqala yaseNingizimu Afrika ukuvikela ngempumelelo lesi sicoco ezisinqobe ngo-2016 zihlula iZamalek kowamanqamu.
Yingalesi sizathu-ke u-Onyango etshele ILANGA ukuthi nakuba lo mdlalo uzokuba nzima kakhulu kodwa bafuna ukuzibuyisa zishisa izinduku kwiCasablanca.
Uthi okuhle wukuthi bazokube bedlala phambi kwabalandeli babo okubanika olukhulu ugqozi.
Uthi ngeke nangengozi bayivumele iCasablanca ukuba iphinde ibehlule.
“Isifice kabi iCasablanca imimoya iphezulu njengoba sisanda kunqoba i-Absa Premiership. Sizokuya kulo mdlalo sinolukhulu ugqozi lokunqoba. Phela sonke ekilabhini sisafuna ukuqhubeka nokuzakhela igama ebholeni lase-Afrika. Uma uyingqwele ye-Absa Premiership kusuke sekufanele ukhombise nezakwamanye amazwe (izingqwele) ukuthi uyinkunzi.
“ICasablanca izosithola siyilindile. Sizoziphindiselela. Phela basidla kabuhlungu ekuhambeni. Ngenhlanhla enkulu ngeke bakhale ngenkundla uma sesibashayile ngoba basebenzisa ezezinga leyethu ngokuba sesimeni esihle. ICaf Champions League isho lukhulu kubadlali naku- mengameli wethu (uPatrice Motsepe),” kusho u-Onyango.
Kulindeleke ukuba ezikaMosimane zibeke ithemba kuPercy Tau ukunika izitobha zezitha ubunzima, uTiyani Mabunda odlala ngokuzwana noHlompho Kekana behlakaza iminyakazo yezitha enkabeni yesisu noOnyango omelwe wukuphunga amabhola azokube ethunyelwa ngabagadli beCasablanca abavutha bengabaselwe.
Isiyonke imidlalo yeCaf Champions League yokuvula isigaba samaqoqo ihlelwe kanje:KUSASA NGOLWESIHLANU EBotswana National Stadium: Township Rollers vs KCCA 18h00.
E-El Arab: Al Ahly SC vs Esperance 21h00.
EStade du 5 Juillet: MC Alger vs Difaa El Jadida 21h00. NGOMGQIBELO ELevy Mwanawasa: Zesco United vs Mbabane Swallows 15h00.
ETP Mazembe: TP Mazembe vs ES Setif Stade 15h00.
EStade Municipal Lome: AS TogoPort vs Horoya FC 18h00.
Estadio 11 de Novembro: 1∞ de Agosto vs Etoile du Sahel 18h00.
ELucas Moripe: Mamelodi Sundowns vs Wydad Athletic Club 21h00 (SS4).