ISOKA ENKANTOLO NGOKUFA KOMFUNDI
UZOVELA enkantolo namuhla osolwa ngokubulala uNkz Zolile Khumalo (21) ( osesithombeni) obenza unyaka wesibili kwiQuantity Surveying eMUT.
KUSOLWA isoka ngokudutshulwa kubulawe umfundi waseMangosuthu University of Technology (MUT), ngoLwesibili ebusuku endaweni ehlala abafundi bale nyuvesi, iLonsdale Hotel, ePhoyinti, eThekwini ngoba limsola ngokuthi usenelinye isoka.
Ngokuthola kweLANGA, uNkz Zolile Khumalo (21) ( osesithombeni) ubulawa nje ubenza unyaka wesibili kwiQuantity Surveying.
Leli soka, esiligodlile igama lalo, kuthiwa lingene endlini yakhe - okungaziwa ukuthi lingene kanjani nesibhamu njengoba kunonogada abaqaphile - maqede lamdubula amahlandla amathathu.
Kuthiwa emuva kwalokho lona wesilisa ubhale enkundleni yokuxhumana uFacebook amagama okuzisola, ethi: “Konke kwaphenduka umlando, ukube benginamandla bengizomvusa silungise amaphutha ngomlomo kodwa manje kuphi la ngoba usehambile wangishiya ngingasashongo ukuthi ngiyamxolela".
Uthe uma eqeda ukubhala lo mbiko, abangani bakhe enkundleni yokuxhumana bakhwele bedilika kuyena, bemxina ngemibuzo ukuthi uze ambulale nje bekwenzenjani. Eziphendulela uthe le nto yenzeke ebusuku kushesha. Uthi usuke wahluthuka wehluleka wukuzibamba.
UNobhala weSouth African Student's Congress (Sasco), esiyingini saseThekwini, uMnu Mlu Stalin Mkhwanazi, ethintwa yiLANGA ngalolu daba, uthe babuhlungu ngokushona kukaNkz Khumalo ngale ndlela, wathi ubeyilungu labo elikhuthele.
Okhulumela amaphoyisa, uLt Col Thembeka Mbhele, uthe umsolwa, oke waba ngumfundi waseMangosuthu, uzinikele emaphoyiseni ngemuva kwalesi sigameko kwatholakala nesibhamu okusolakala ukuthi yisona abulale ngaso uNkz Khumalo.
Uthi umsolwa uzovela namhlanje eNkantolo yeMantshi eThekwini.