Masizibheke izinto ezizosenza silulazeke
PHAMBILINI isizwe esimpisholo besidume futhi saziwa ngenhlonipho, ikakhulukazi omama. Amakhosikazi abezihlonipha, ikakhulukazi uma sekwedlule umnumzane wekhaya emhlabeni.
Ubuthola inkosikazi izisalela nabantwana bayo ibakhulise kahle ifudumeze nekhaya layo, kungabonakali nokuthi ubaba akasekho. Babekhona-ke abanye omama ababegana futhi emuva kokwedlula kwabayeni babo emhlabeni, kodwa bekwenzeka ngenhlonipho.
Kwesinye isikhathi noma engeke ashade, wayeba nomuntu ahlekisana naye kodwa kungabi yinto ebukwa yizwe lonke ngoba ibisuke imbusa le nto yokuthi useke wagana futhi unezingane okumele azihloniphe nesithunzi somuzi wendoda yakhe yokuqala okumele asigcine sivikelekile.
Sengathi izinga lale nhlonipho engikhuluma ngayo selithanda ukwehla ngoba usuthola ukuthi uma owesifazane esethole omunye umyeni emuva kokushonelwa ngowokuqala, kuba sengathi usekulibele ukuthi uke wagana phambilini ngenxa yendlela asuke eseziphethe ngayo.
Kuthanda ukulumela ukuthi ekhaya lomnumzane ongasekho uthole sekukhona omunye osehlala khona, avuke ekuseni impela eqimbile, izingane zikamufi zibuka. Kuba sengathi kazihloniphi izingane uma sezizwakalisa ukungaphatheki kahle kwazo ngesenzo sikanina kanti qha. Kuyangithinta impela lokhu hhayi ngoba ngizama ukucindezela abantu besifazane.
Engikhala ngakho wukuba kwenziwe izinto ngendlela enenhlonipho kulezi zingane zalo baba ongasekho nomuzi wakhe. Okuphazamisayo kakhulu wukuthi lo malokazana usuke ekade ebikiwe emsamo waleli khaya, wethulwa kwabaphilayo nabangasekho, kwashiwo ukuthi useyilungu lomndeni.
Uma umyeni wakhe eseshonile, lona osezohlala kuleli khaya, osethathwa njengobaba, yena ubikwa kubani futhi kuthiwa ungubani? Le nto icishe ifane nengane engenisa isoka layo kubo, ihlale nalo, lilale livuke. Lokhu kudala ukululazeka kwekhaya naye umama uqobo ngisho nezingane ngoba lo baba usezophawula lapha ekhaya. Umbuzo uthi uphawula njengobani ngoba ubaba wekhaya sewashona? Kuyenzeka kokunye umama oshonelwe angenwe ngumfowabo womyeni wakhe ngokuvumelana kwemindeni.
Lokhu kuyabikwa ngohlelo lwawo umndeni, kwaziswe izidalwa nezingane zichazelwe kahle uma sezisesigabeni esifanele ukuze kwamukeleke kwabathintekayo. Lo baba wakwesinye isibongo ufika kanjani emzini wenye indoda aze athuthe nezimpahla ayohlala khona?
Isibongo salapha ekhaya sona kuthiwa sekuyikwabani? Kangizami ukwahlulela kodwa ngifisa sizibheke izinto ezisehlisa isithunzi. Ngicabanga ukuthi umuzi wendoda uyohlala ungowayo, iphila noma ingasekho. Kuhle singathathwa yimizwa ize isenze sizikhohlwe, silimaze nobuqotho bethu. . Insika yaMathiyane (isigodlo) UThishanhloko waseMatatane Secondary School. mthiyanesgs@yahoo.com