INDIDA KULAHLEKA OWESILISA
UDUNGUZA ebumnyameni umndeni wowesilisa waseNkwenkwe, eMelmoth, oduke ngempelasonto ephuma komunye umcimbi wasendaweni ngeledlule.
Namanje umndeni kaMnu Nhlanhla Mthethwa (34) (osesithombeni), usadidekile emuva kokuba engabuyanga kanti kusolwa ukuthi kukhona okumvelele endleleni ebheke ekhaya. Okwenza umndeni wakhe usole lokhu, wukuthi kulo mcimbi abekuwona kunemibiko ethi khona ahilizisane nabo.
Okwenze umndeni ukholwe yilokhu, wukuthi ngesikhathi umphakathi ubheka uMnu Mthethwa, kubuye kwatholakala nophaqa abewugqokile ngalolu suku alahleke ngalo. UNkz Phumzile Mthethwa ongudadewabo, uthi okwenza balahle ithemba wukuthi akazange aye emsebenzini ngoMsombuluko njengoba bekulindelekile.
Uthi lokhu kukodwa kukhomba ukuthi khona okubi okumvelele. “Ngelanga ahambe ngalo ekhaya uNhlanhla, ushiye intombi yakhe abefike nayo. Uhambe waya komunye umuzi obekunomcimbi kuwona. Silale ngoMgqibelo engabuyanga ekhaya sabe sesiphuma umkhankaso simbheka ngosizo lomphakathi ngeSonto.
"Sibikele amaphoyisa ngalokhu nawo afika ukuzosibhekisa, kodwa sangamthola.
"Kwenzeka lokhu nje, besilokhu sizama ukumshayela ucingo lukhala, kodwa lungaphendulwa muntu.
"Amaphoyisa azamile ukulandela umkhondo walapho beludonsa khona. NgoLwesibili lwavalwa. Asitshele ukuthi kawasayitholi i- signal, okukhomba ukuthi luvaliwe,” kusho uNkz Mthethwa.
Uthi bacela nanoma ngubani ongaba nolwazi noma obonile ukuthi ushonephi umfowabo, axhumane namaphoyisa.
Okhulumela amaphoyisa KwaZulu-Natal, uCapt Nqobile Gwala, usiqinisekisile lesi sigameko wathi kuvulwe idokodo emuva kokulahleka kowesilisa.