I-DA isizifake otakwini olungayilimaza okhethweni
UBUDLABHA iqembu eliphikisayo, iDemocratic Alliance (DA) elisingathe ngabo udaba lweMeya yaseCape Town, uNkk Patricia de Lille, buzolilimaza kakhulu okhethweni lukazwelonke oluzokuba ngonyaka ozayo.
Sekuphele izinyanga ezimbalwa iDA izama ukukhipha uNkk de Lille esikhundleni, imsola ngamacala enkohlakalo nokungakwazi ukusebenzisana kahle nozakwabo eqenjini kuMasipala waseCape Town. Isike yazama ukumketula esikhundleni ngokuba itshele amakhansela angamalungu ayo emkhandlwini ukuba amxoshe ngevoti lokungabethembi ubuholi bakhe ( vote of no confidence).
Le mizamo iphunzile emuva kokuba amanye amalungu eDA evote neqembu eliphikisayo emkhandlwini waseCape Town, i-ANC, ukweseka uNkk de Lille ukuba aqhubeke ukwengamela umasipala. UNkk de Lille ulokhu eme kwelokuthi uma onile, icala lakhe malithethwe esidlangaleni, kubuka izwe lonke, okuyinto iDA engahambisani nayo ngoba ithi le yindaba yangaphakathi eqenjini, ngakho kufanele idingidwe ngasese. Ekuqaleni kwaleli sonto ubuholi beDA bukhiphe isitatimende esithi uNkk de Lille akaselona ilungu laleli qembu ngoba utshele isiteshi somsakazo esizinze eGoli, ukuthi uma eseliwinile icala, lagezeka igama lakhe, uyokwesula eqenjini. IDA ithe ngokusho lokhu, uNkk de Lille wephule imigomo yeqembu, wazixosha yena kulona.
IDA isenkingeni ngoba uNkk de Lille ufana nexoxo lenqaba ukuphuma endlini njengoba emi kwelokuthi umsulwa, akayi ndawo lingagezekanga igama lakhe esigcawini samacala seqembu.
Uhlela ukuya enkantolo ukuyophikisana nesinqumo seqembu sokumesula emabhukwini alo. Ingwadla ebhekene neDA, wukuthi ukuqhubeka kwalolu daba luvela emaphephanda-beni nakweminye imithombo yabezindaba, lungaphothulwa ngokushesha, kuhudulela ezibini igama layo emehlweni abavoti bamakhaladi ayiningi eWestern Cape, ephethwe yiDA.
UNkk de Lille, oyikhaladi, akaconsi kulo mphakathi, okuyisimo esingalimaza iDA okhethweni lwangonyaka ozayo uma lo mphakathi ojwayele ukuxhasa leli qembu, ungavotela elinye iqembu. Okunye okwenza isimo sishube kakhulu wukuthi sekusabalele izinsolo zokuthi abaholi abampisholo kuleli qembu, kubandakanya nomholi walo imbala, uMnu Mmusi Maimane, kabafunwa, kodwa bayabekezelelwa nje ngabamhlophe ukuze basetshenziswe njengethuluzi lokunxenxa abavoti abansundu.
Lezi zinkinga zangaphakathi zeDA zibukeka zizoyinqinda amandla ekutholeni abavoti abansundu. Inkinga yaleli qembu wukuthi ngaphandle kwevoti labampisholo, ngeke likwazi ukuhlwitha amandla ombuso kwi-ANC. Iqembu elibukeka lizosikala ngokukhubazeka kwe-DA, yi-ANC.
I-DA izinqinda amandla ukuthola amavoti.