Kumi kuphi manje ngoMahumapelo?
Ubukeka sengathi akazimisele ukuya phansi engandlalelwe
UKUTHI “soyicela ivuthiwe” kungena khaxa odabeni olusematheni njengamanje ngekusasa likaNdunankulu waseNorth West, uMnu Supra Mahumapelo.
Emuva kwezibhelu zakamuva eziphethe ngokuba uMengameli Cyril Ramaphosa ( osesithombeni) anqamule uhambo lwakhe lwasemazweni asentshonalanga ukuyokhonga osozimboni bawo ukuba bazotshala imali eNingizimu Afrika, kumiswe ithimba longqongqoshe elikhethekile ( ministerial task team) ukuyobheka imbangela yezikhalo zabantu baseNorth West.
Naphezu kwengcindezi yabantu abathi makabeke phansi izintambo zokuhola lesi sifundazwe, ubukeka sengathi akazimisele ukuya phansi engandlalelwe uMnu Mahumapelo lona.
Uthi ngeke esule esikhundleni kuze kusho i-Provincial executive committee (PEC) yeqembu lakhe, i-African National Congress (ANC) kulesiya sifundazwe ngoba phakathi kokunye ukholwa wukuthi konke lokhu kuyitulo nje, lezombusazwe elakhiwe ngabathile lokumketula esikhundleni.
Ngesikhathi sokuloba, isinqumo somhlangano wePEC angusihlalo wayo uMnu Mahumapelo, sibe uzoshenxa esikhundleni okwesikhashana, ukumnika isikhathi sokugeza igama lakhe.
Isigcawu nabezindaba ebesihleliwe ukuba senzeke izolo ekuseni lapho uMnu Mahumapelo ebethembise ukuthi uzokwenza khona isimemezelo ngokushiya kwakhe esikhu- ndleni, sihlehlisiwe ngomzuzu wokugcina.
Maqondana nesikhundla sokuba ngusihlalo we-ANC kulesiya sifundazwe, uthe kuyaziwa ukuthi bonke abasezikhundleni zobuholi bakhethwa yingqungquthela ehlelekile ngokomthethosisekelo weqembu, okusho ukuthi uzoba sesikhundleni kuze kuphele ihlandla lakhe ngonyaka ozayo.
Khona lapho, kubikwa ukuthi kunabathile abathi bazoluphazamisa ukhetho lwango-2019 uma ekhishwa uMnu Mahumapelo.
Lokhu kufakazelwa wukudungwa komhlangano wePEC yiqeqebana lalabo abamesekayo. ILANGA lixoxe nomhlaziyi wezombusazwe, uSolwazi Shadrack Gutto othe uMnu Mahumapelo useshaye ungqimphothwe esithembisweni abesenzile ukuthi izolo uzokwenza isaziso ngokwesula kwakhe esikhundleni.
Uthe lena yinkinga ebhekene ne-ANC, ikakhulukazi iPEC yayo eNorth West. Utshele ILANGA ukuthi ngeshwa okusabonakala ekwenza uMnu Mahumapelo, wukuphika yonke into okukhalwa ngayo futhi lokhu ukwenza ngendlela engaphusile, kwazise labo abakhala ngaye kunokuphathekayo abakukhombayo, okuyizizathu zokuthi manje sebekhathele. Uphethe ngokuthi ubona kungcono ukuba uMnu Mahumapelo enze into ehloniphekile, abeke phansi amatomu okuhola lesiya sifundazwe, angalindi amathonsi abanzi lapho amalungu e-ANC esiShayamethetho saseNorth West, ngosizo lwamalungu amaqembu aphikisayo, bezoze benze isiphakamiso sokumkhipha ngevoti lokungamethembi. Omunye umhlaziyi we-zepolitiki, uMnu Zamikhaya Maseti, yena ubona ukuthi ukuzabalaza kukaMnu Mahumapelo kuyefana nalokho isisho sesiNgisi esithi kuwukukhahlela kokugcina kwehhashi uma lifa. Uthe ngisho angagqugquzela ukwesekwa yiPEC kodwa ngeke kwamsiza lokho uma i- national executive committee (NEC) ye-ANC ithatha isinqumo sokuba ahoxiswe ngoba kakade umsebenzi kahulumeni esifundazweni asiholayo ujamile ngenxa yenkohlakalo okubikwa ukuthi iyenzeka kweminye iminyango.