UDHLOMO UYOCHAZELA I-SAHRC NGOLWEZIGULI ZOMDLAVUZA
UVELA phambi kweSouth African Human Rights Commission (SAHRC) namhlanje uNgqongqoshe wezeMpilo KwaZulu-Natal, uDkt Sbongiseni Dhlomo, ukuyozochaza kabanzi ngesimo esingesihle esibhekene nabantu abelashelwa umdlavuza kulesi sifundazwe.
Kulindeleke ukuba avele phambi kweSAHRC emahhovisini ayo aseBraamfontein, eGoli ngo-10 ekuseni. Ubizwa yile khomishini uDkt Dhlomo nje, kunophenyo ebilwenza ngokunyathelwa kwamalungelo eziguli ezilashelwa umdlavuza njengoba bezilindiswa isikhathi eside zingelashwa ngenxa yokuthi imishini eshisa umdlavuza e-Addington Hospital, eThekwini ibingasebenzi.
Zonke iziguli zigcine sezidluliselwa e-Inkosi Albert Luthuli Central Hospital, eCato Manor lapho bezilindiswa khona izinyanga ngaphambi kokuba zisizwe, ezinye zigcine zishona zisalindile.
Phambi kwale khomishini uDkt Dhlomo kumele achaze ukuthi kungani umnyango wehlulekile wukushesha ulusukumele lolu daba.
Okhulumela iSAHRC, uNkk Gail Smith, uthe noma engeke adalule imininingwane eminingi kodwa uDkt Dhlomo bamlindele ngamehlo abomvu ukuba avele phambi kwekhomishini namuhla.
Okwenze uDkt Dhlomo wangena emanzini abilayo kakhulu, wukuthi isanda kuvela le nkinga ebhekene neziguli ezinomdlavuza, ubelokhu ephika ukuthi kunenkinga.
Kuzokhumbuleka ukuthi ngoJulayi wonyaka odlule, ilungu leDemocratic Alliance (DA) elibhekelele ezempilo ephalamende, uNkk Patricia Kopane, nelungu lesiShayamthetho saKwaZulu-Natal ngaphansi kweDA, uMnu Imran Keeka, bavinjiwe befuna ukuyozibonela isimo lezi ziguli eziphila ngaphansi kwaso kulezi zibhedlela.
Kushube isimo uDkt Dhlomo ekhuluma nala malungu eDA ngocingo. Uthe uwavimba ngoba kawasihloniphanga isikhathi sokungena esibhedlela.
Ethula isabelomali somnyango wakhe ngoLwesine, uDkt Dhlomo ukuvezile ukuthi umshini omusha usufikile esibhedlela saseThekwini, osekusele wukuba uxhunywe uqale ukusebenza.
Eminye imishini uthe iyalungiswa, ingase ibe sesimeni sokusebenza maphakathi noJuni.
UMnu Keeka uthe uDkt Dhlomo kufanele aphendule ngale nkinga ebhekene neziguli ezelashelwa umdlavuza.
“Uma ehlulwa yilokho makavele ahambe ngoba selokhu kuphethe yena isimo sezempilo sibe sibi kakhulu kule minyaka ewu-9 edlule.
Izinhloko zomnyango kasazi ukuthi sezishintshwe kangaki selokhu ephethe. Ilungu leNkatha Freedom Party (IFP) esishayamthetho, uNkk Ncamisile Nkwanyana, lithe ukushoda kodokotela yinkinga yeminyaka kulo mnyango futhi kayilungiswa.
Umnyango uthe ulindele odokotela abawu-262 abasanda kuphothula izifundo zabo eCuba, okholwa wukuthi bakuzoqeda ukushoda kodokotela kulesi sifundazwe.