OwePirates uzanyelwa umsebenzi e-Europe
Kuthiwa akaseneme kumaBhakabhaka
UZANYELWA umsebenzi e-Europe umdlali weOrlando Pirates okuvela ukuthi akaseneme ngokuhlala kule kilabhu.
IBucs ijabulise abalandeli bayo imemezela ukuthi isayinise u-Abbubaker Mobara odlala emuva obegijima kwi-Ajax Cape Town.
Nokho lo mdlali selokhu efikile kwiBucs akakayibambi indawo njengoba engena ephuma eqenjini. Ubuye amiswe kabi wukulimala.
Ubesebhentshini iBucs yehlula iFree State Stars ngo-2-1 kowe- Absa Premiership ngoMgqibelo ntambama e-Orlando Stadium, eSoweto.
ILANGA lithole ukuthi lo mdlali angase alibhekise e-Europe ukuyozama inhlanhla emakilabhini akhona. Kuthiwa uLance Davids ongumphathi wakhe ozinze eBelgium, umzamela emakilabhini akhona futhi akhombisa ukumuthanda.
“UMobara kungenzeka aye e-Europe ngoba vele yiphupho lakhe ukuyodlala khona. UDavids uke wakhuluma naye, wamazisa ukuthi kukhona okuhlanganayo, kungenzeka bambize maduzane. Kunamakilabhu aseSweden nawaseBelgium akhombisa uku- mthanda.
"Nokho yonke indlela izodlula kwiPirates ngoba usanenkontileka nayo.
“Kodwa akaboni iPirates imuvimba ukuya phesheya ngoba kwinkontileka yakhe kunesivumelwano sokuthi uma kukhona ikilabhu emfunayo phesheya (iPirates) izomdedela kodwa kufanele ikhiphe imali ethile,” kusho umthombo.
Ethintwa uMobara, uthe makubuzwe imenenja yakhe ngalolu daba ngoba yiyona eyazi kangcono ngezindaba zakhe. Nokho imizamo yokuthola uDavids kayiphumelelanga njengoba ucingo lwasehhovisi lakhe eBelgium belungangeni.