Uzoqashwa ngelokhozi oweNatu
UMnu Thompson uhlaselwe ngeledlule
ISIDELE konke iNational Teachers' Union (Natu) yaqinisa ezokuphepha kwesekela likamengameli wayo, uMnu Allen Thompson ( osesithombeni), emuva kokuhlaselwa kwakhe ngoLwesihlanu, ntambama ngabesilisa abangaziwa, bemdubula.
UMengameli weNatu, uMnu Sphosethu Ngcobo, uthi ikhathazekile inyunyana ngemizamo yokusocongwa kukaMnu Thompson, yingakho sekuqashwe inkampani ezimele yonogada esezingeni eliphezulu, ezokwenza okusemandleni ukuthi uphephile.
Utshele ILANGA ukuthi njengoba uMnu Thompson, esesibhedlela, nakhona ugadiwe. Uthi onogada bazotshalwa emzini wakhe ubusuku nemini, emsebenzini ngisho esemgwaqweni akasophinde ahambe yedwa. Uthi okubavule amehlo kakhulu wukuthi ngisho ubuholi bukazwelonke bamaqembu ezepolitiki, bumvule amehlo bathi makagadwe kakhulu.
“Isimo sakhe siyathembisa nakuba ebedubuleke kabi kodwa uzophuma maduze esibhedlela. Ezokuphepha kwakhe zizoqiniswa kakhulu, akukho okungahlula inyunyana,” kusho uMnu Ngcobo.
Utshele ILANGA ukuthi ngoLwesine oluzayo kuhlelwe umthandazo omkhulu wamalungu enyunyana eMbizo Hall, eMpangeni lapho uMnu Thompson, ezobe eyo- bikela amalungu ngokumehlele.
Uthi ziyakhula kakhulu izinsolo zokuthi uMnu Thompson, bebezama ukumbulala ngenxa yokuthi iNatu yiyona evundulule amahlazo nezinsolo zenkohlakalo eMnyangweni wezeMfundo KwaZulu-Natal, yacela uphenyo olunzulu kuzwelonke ngokusebenza kwemali nokungaqasheki kothisha.
“Ngesikhathi kwenzeka lesi si- gameko ngoLwesihlanu, ngokuphazima kweso ngifonelwe wumnyango wezemfundo kuzwelonke, ngugqongqoshe, ngumqondisi wawo ne-Education Portfolio Committee kodwa uNgqongqoshe uDlungwana yena waze wangifonela ngoMgqibelo ebusuku ethi ubona ezindabeni kumabonakude ukuthi kulimale uMnu Thompson.
“Inhloko uDkt Enoch Nzama, ingithinte emini ngoMgqibelo. Lokhu kushiya imibuzo ethi kungaze kuyokwazi uzwelonke kodwa abantu abaseduze kwethu bona bethi bebengazi,” kusho uMnu Ngcobo.
UMnu Kwazi Mthethwa okhulumela uMnyango wezeMfundo KwaZulu-Natal, uthe: “Kusiphethe kabi ukuthi kulimele umuntu esisebenzisana naye futhi kasikaze sibone izitha zethu uma sibona iNatu. Ungqongqoshe ngenxa yokuthi umatasa ezindaweni eziningi, kungenzeka ukuthi lesi sigameko usibone ngaleso sikhathi.
“Siyazwelana noMnu Thompson noma ngabe inyunyana isola thina,” kusho uMnu Mthethwa. UMnu Thompson uhlaselwe emgwaqweni u-N2 ngaseMhlanga, eThekwini, esuka eMpangeni, elibangise eThekwini.
Uvinjezelwe yimoto erobhothini ebelivalile abebephakathi badedela inhlamvu, wabe esebaleka khona livalile wa-shintsha umzila akabange esabheka ngalapho ebeya ngakhona, wangena ku-M14 nokuphoqe ukuba le moto yezinkabi iyothola indawo yokujika yabe isimhubha.
Kuthiwa uMnu Thompson ubaleke waze wangena kwesinye sezibhedlela eziseduze. Lezi zinkabi zimhubhe zaze zangena nezibhamu esibhedlela kwabaleka kwasani, okuyilapho eduke khona uMnu Thompson, zangakwazi ukumthola.
Kubikwa ukuthi uMnu Thompson, imoto uyishiye esangweni lesibhedlela nezikhiye zabe seziyivula izinkabi zathatha ama- laptop abequkethe imininingwane ebalulekile yeNatu, nemali engadaluliwe.