Indida kuhlaselwa kubulawa umndeni
Kungene umsolwa obengazifihlile wabakhomba ngesibhamu
UTHUKE wamelwa yinhliziyo, washona umfanyana oneminyaka ewu10 ubudala ebuka kubulawa uyise odutshulwe ngentululwane yezinhlamvu phambi komndeni wakhe ngoLwesibili ebusuku.
Kunzima nokukhuluma emalungwini omndeni wakwaMoholi, oGunjini, eNdwendwe ngento ayibonile kubulawa uMnu Musa Moholi (49) qede kwashona nendodana ngenxa yokwethuka.
ILANGA lithole ukuthi uMnu Moholi ongowokudabuka eMzimkhulu - obenomuzi eNdwendwe kodwa ehlala eKenville, eThekwini ngenxa yomsebenzi, egoduka uma engasebenzi - uhlaselwe ngabantu abangaziwa ngoLwesibili ebusuku ehleli nomndeni wakhe bebuka umabonakude. Kushone yena nendodana yakhe uBonginhlanhla Ndlela kwathi enye u-Aphile Ndlela (11) edubuleke emzimbeni, yaphuthunyiswa esibhedlela isimo sayo singesihle.
Kubikwa ukuthi uMnu Muholi ubulawa nje, izolo ngoLwesithathu bekulindekele ukuba avele esigcawini sokuqondiswa kwezigwegwe emsebenzini wakhe lapho abesebenza khona njengomshayeli wamaloli. Kubikwa ukuthi ubebhekene necala nozakwabo.
Ngosuku abulawe ngalo, ubekade ehleli ekhaya imini yonke njengoba ebehlabe ikhefu. Ngokuthola kwaleli phephandaba ngoMnu Sbusiso Phewa, oyilungu lomndeni, usbari wakhe ubengumuntu olungile, ubengakaze ababikele lutho olumphethe kabi noma abantu axabene nabo.
Uthi ubejwayele ukuvakasha emzini wakhe uma engasebenzi. "Sithole ukuthi kunocingo oluqale lwamfonela ngaphambi kokufika kwababulali. Kube yisikhashana kungene lolo cingo, bahlaselwa. Kasimzwanga ubexoxa ethini ocingweni, kodwa siyasola ukuthi bekungabasolwa befuna ukuqinisekisa ukuthi ukhona yini.
Kungene umsolwa oyedwa obengazifihlile ebusweni wabakhomba ngesibhamu, wabaphoqa bonke ukuba baye ekamelweni," kusho uMnu Phewa. Uthi umsolwa udubule uMnu Moholi amahlandla amathathu kwadubuleka noAphile. Uthi uBonginhlanhla wethuke kakhulu, kusolwa ukuthi umelwe yinhliziyo ngaleso sikhathi, washona.
UMnu Phewa uthi abasolwa sebehambile, kunyamalale nocingo lukaMnu Moholi lolu agcine ukufonelwa kulona.
“Sebehambile, bese kusele ucingo olulodwa obelucishile ngesikhathi kwenzeka lesi sigameko. Abasolwa kabathathanga lutho ngaphandle kwalolu cingo,” kusho yena. UMnu Sonosini Phewa uthi ufe olwembiza ngokubulawa komyeni wendodazi yakhe. “Ubesefana nendodana yami endala, engihlonipha. Ubeseqale nokwakha umuzi wakhe nendodakazi njengoba sebeshadile,” kusho uMnu Phewa.
ILANGA lifike kwaMoholi induna yendawo, uMnu Thulasizwe Ngcobo, ime namadoda besathukile. Ithe kuyaqala ukuba kwenzeke into efana nalena esigodini sayo. “Sizosebenza namaphoyisa ukuthola ukuthi le nto iqhamuka kuphi, sithole abasolwa,” kusho uMnu Ngcobo. Okhulumela amaphoyisa KwaZulu-Natal, uCol Thembeka Mbhele, uthe kuvulwe amacala amabili okubulawa kwabantu eNdwedwe, amaphoyisa asenza uphenyo bekungakaboshwa muntu.