Baphelile yinduku abashayeli eMtuba
Kusolwa osomatekisi
BAHLELI lubhojozi othisha nabashayeli abakhele uMtubatuba namaphethelo emuva kokuba ngoMsombuluko bengenelwe ngenduku ngabanikazi bamatekisi, bebasola ngokugibelisa abantu emgwaqweni.
Kuthiwa baphelile yisibhaxu abanye othisha namanye amalungu omphakathi njengoba kuthiwa bekunenqwaba yamadoda abekanise emgwaqweni, evimba izimoto ezithwele abantu abangaphezulu kwababili.
Abanye kubikwa ukuthi bebeshaywa bese kufakwa ushukela ezinjinini zezimoto zabo. Indlela isimo ebesishube ngayo, isiteshi samaphoyisa eMtubatuba besiphithizela abanikazi bezimoto beyovula amacala okushaywa.
Abasolwa kuthiwa bebehamba ngezimoto zikasoseshini waseMtubatuba. Okukhalisa kakhulu abantu wukuthi kunabantu abashayiwe ekubeni bebezihambela nemindeni yabo.
ILANGA likhulume nomunye wothisha oshayiwe - ocele ukuba igama lakhe lingadalulwa - uthe lokhu kumehlele ehamba nozakwabo ababili bephuma emsebenzini.
Uthi ukuhamba kwabo ndawonye basuke bekwenzela ukonga uphethiloli ngoba vele basuke beya endaweni eyodwa.
“Sithe sesidlula ngasebhulohweni eNkodibe, ngabona inqwaba yabantu ingena emgwaqweni iphethe izibhamu, yangikhomba eceleni. Angikhombise imoto yawo ebibhalwe ukuthi Mtubatuba Taxi Association, abuza ukuthi mina ngingaphansi kwamuphi usoseshini njengoba ngithwele abantu.
“Ngiwachazelile ukuthi ngifundisa kwesinye sezikole, angikhipha emotweni. Angishaye ngezimpama, engitshela ukuthi ngicoshe abantu emgwaqweni,” kusho yena.
Uthi emuva kwalokho amdedelile ukuba angene emotweni kodwa wazonela ngokuthi abuke laba abebemshaya. Avele amthelekela wonke ngenduku ngoba ethi uyawamaka.
“Baqede lapho bangidedela ngahamba. Endleleni ngihlangane namaphoyisa omgwaqo ngawachazela ngokungehlele. Angitshele ukuthi kangiyena owokuqala, baningi ahlangana nabo bewatshela ukuthi bashayiwe.
“Angiyalele ukuba ngiye emaphoyiseni ngiyovula icala,” kusho yena.
Elinye ilungu lomphakathi nalo elishayiwe, lithi lisekude ukukhohlwa yilesi sigameko njengoba lishaywe phambi komndeni walo, okubalwa nengane yalo. Lithi belibheke kwaMsane, khona eMtubatuba, ngesikhathi limiswa yiqulu labantu ebeliphethe izibhamu.
“Emotweni bengihamba nonina wengane yami, udadewethu, yingane yami nomunye ongumngani wesihlobo sethu. Ngithe uma ngiqeda ibhuloho iNkodibe, ngavinjwa yila madoda.
“Ngenxa yokwesaba, ngidlulile ngizitshela ukuthi ngabantu abafuna ukungiphuca imoto. Ngithe uma ngidlula ngabona imoto kasoseshini walapha eMtubatuba, ngama ngaphindela kubona. Bangibuze ukuthi ngibathathaphi abantu engihamba nabo. Ngithe ngisachaza bangingenela ngenduku phambi komndeni wami. Kwale ngisho usukhala umndeni ungicelela ukuba bangiyeke kodwa baqhubeka.
“Bangisusile eduze kwemoto bangihlalisa phansi kwakhona abavula imoto yami ngaphambili. Kuthe uma ngibuyela kuyona umndeni wangitshela ukuthi bafake ushukela ngaphambili. Ngaleso sikhathi ingane ibikhala nemoto ingasadumi, kuze kwadingeka ukuba ngibize imoto ezongidonsa,” kusho yena.
UMnu Jabulani Manqele, ongusihlalo weSouth African National Taxi Council (Santaco) esifundeni uMkhanyakude - aphinde abe ngunobhala wale nhlangano KwaZulu-Natal - uthi bebengakaze bazithole izikhalo mayelana nalezi zigameko zokushaywa kwabantu.
Ukugxekile lokhu wathi kabahambisani nakho.
Okhulumela umnyango wezokuThutha KwaZulu-Natal, uMnu Kwanele Ncalane, uthe zikhona izikhalo abazitholile kanti udaba ludluliselwe emaphoyiseni ukuze abenze lokhu bezoboshwa.
Okhulumela amaphoyisa KwaZulu-Natal, uCol Thembeka Mbhele, ukuqinisekile ukuthi akhona amacala okushaya nawokulimaza impahla avulwe eMtubatuba naKwaMsane kodwa okwamanje bekungakaboshwa muntu.