KUMILE NSE UKUFUNDA
IKHATHAZA abaphathi bezikole eyombhikisho wamalungu omphakathi waseNgonyameni, eNgwavuma, okhala ngeNkosi Mphumeleli Lubelo II Mngomezulu, esolwa ngokuthatha ilambu enkundleni kuDedefane - kuyona le ndawo layofakwa esigodlweni sayo eNkungwini.
Kusukela ngoLwesihlanu mhla zizine kule nyanga kuze kube yimanje, kumile ukufunda nokufundisa eMngceleni Primary School naseLubelo Secondary School.
ILANGA libikile ngodaba lwalo mbhikisho lapho amalungu omphakathi asola uMnu Ernest Vilane ongundunankulu weNkosi Lubelo - abuye abe yikhansela laku- ward 18, ngokuhlangana nenkosi bathutha ilambu enkundleni yezemidlalo layofakwa esigodlweni.
ILANGA lixoxe nabazali babafundi bakulezi zikole, abaveze ukuthi bakhathazekile ngenxa yalesi simo. Nokho bakhona abathi ibambe ngakho njengoba kuvalwe izikole.
NgoMsombuluko ILANGA lixoxe noMnu Jethro Mqanjelwa Mngomezulu, ongusihlalo wesigungu esilawula isikole uMngceleni, othe yena nengxenye yabazali bakhathazekile ngalesi simo.
UMnu Mngomezulu uwuzalo lwasendlunkulu yesizwe sakwaMngomezulu ohlangothini oluhambisana nenkosi esolwayo. Unxuse umphakathi ukuba wehlise amaphaphu, ubambisane, ukuze kufinyelelwe esiphethweni ngalolu daba.
“Egameni lesigungu esengamele isikole, sikhathazekile ngokuvalwa kwezikole ngoba kulimala ikusasa lezingane zethu. Uma kwenziwa imibhikisho enje, kwakheka isithombe esingesihle kubantwana abasakhula.
"Siyacela umphakathi ukuba ubhekelele ikusasa lezingane ngoba ziyasala ezifundweni,” kunxusa uMnu Mngomezulu. Umhloli obhekelele ukusebenza kulezi zikole, uMnu Sphephile Vumase, uthi umphakathi kufanele ungakhohlwa yimfundo yezingane zawo.
UMnu Kwazi Mthethwa, okhulumela uMnyango wezeMfundo KwaZulu-Natal, uthe kakufanele kuthinteke imfundo yezingane uma umphakathi ubhikisha. Unxuse othishanhloko ukubikele umqondisi womnyango eMkhanyakude, uMnu Mjozi Motha.