Sishone sidumele nge-ANC isishoshovu
Besikhala nangokungabhekelelwa kwamasosha oMkhonto Wesizwe
IBHOBOKE emngcwabeni kanina indodana yesishoshovu somzabalazo esasebenza umshoshaphansi, sishushumbisa amasosha oMkhonto Wesizwe, yatshela ubuholi be-African National Congress (ANC) ukuthi unina uhambe edumele ngokunganakwa kwabalelwa izwe ngezikhathi zobandlululo.
UMnu Gevas Duma, oyindodana encane kaNkk Nonceba Duma waseClermont, ofihlwe emathuneni aseLalakahle, eHillcrest, ngeSonto, - emuva kwenkonzo ebiseGreyville Race Course, eThekwini, uzwakalise ilaka lakhe ebhekise ezikhulwini ze-ANC okubalwa kuzo uDkt Nkosazana DlaminiZuma, uMnu Jeff Radebe, uMnu Senzo Mchunu noNkk Nomusa Dube-Ncube.
Uthe unina uze wahamba emhlabeni esebenzela i-ANC, eyithanda ngenhliziyo yakhe yonke.
“Kukhona abathola izindondo bengazisebenzelanga, yena kuthe noma esegula, ubelokhu eyalezile ethi singawuyeki umzabazo. Ngithanda ukukusho ngikubhekise kini zikhulu zeqembu ukuthi njengoba engasekho nje, izingane zakhe nabazukulu kasazi bazothathani bahlanganise nani ngoba bafundile, kepha imisebenzi kayikho, ekhona iyakhokhelwa.
“Ubesebenzela iqembu engabheke nzuzo, sicela niyibhekisise le ndaba,” kusho uMnu Duma. Uthi unina uhambe ephoxeke kabi ngeqembu lakhe, ubesho nokusho ukuthi: “Badla bodwa kabanamahloni, ngisho nomakadebona kwezomzabalazo, ababengamasosha oMkhonto Wesizwe, bahlale bebamba amabhokisi uma kushoniwe kepha kabawutholi umsebenzi.”
Nendodakazi yokuqala kamufi, uDkt Nomzamo Tutu, oshadele kwaKhuzwayo, ihambe emazwini kamfowabo. Ithe unina ubashiye nefa, ebafundisa ukuzimela kusukela ebuncaneni babo. UMnu Radebe, ukhale ngokubulalana kwamalungu e-ANC wathi oNkk Duma, bona bebelwela ubunye beqembu, besebenzela isizwe, hhayi imali nokuzicebisa bona.
UDkt Dlamini-Zuma, unxuse abantu ukuba bahambe ezinya- thelweni zikamufi obesebenzela i-ANC, eyikhankasela ngezindlela zonke. Bobabili laba baholi kabashongo lutho ngenselelo abayiphonselwe nguMnu Duma.
Badla bodwa kabanamahloni ngisho nomakadebona kwezomzabalazo, ababengamasosha oMkhonto Wesizwe, bahlale bebamba amabhokisi uma kushoniwe kepha kabawutholi umsebenzi.