USENGCUPHENI YOKUNGASHADI ONOMAZISI "OYIWELE"
USEZIBONA njengomuntu ofile kodwa ebe ephila owesilisa waseNewcastle, onenkinga yokuba nomazisi onemininingwane efana nse neyowesilisa waseGoli.
UMnu Philani Ndebele (33), uthi usegqigqe kwaze kwaguga izicathulo eya emahhovisi oMnyango wezaseKhaya, eNewcastle, kodwa engalutholi usizo, emuva kokuthola ukuthi umazisi wakhe “uyiwele”.
Utshele ILANGA ukuthi ngo-Epreli nyakenye, uthole ukuthi kunomuntu osebenzisa umazisi ofana nowakhe ngesikhathi efonelwa yinkampani yomshwalense, i-Unlimited, ifuna ukuvuselela umshwalense wakhe ngoba ithi ubusuphelelwe yisikhathi ngenxa yokuthi ubengasakhokhi.
Utshele obemfonele ukuthi akanawo umshwalense wakwa-Unlimited futhi yena akahlali Goli.
“Ngiqonde kwandabazabantu ngesikhathi ngithola lo mbiko, ngiyoqinisekisa lokhu. Obengisiza khona ukuqinisekisile ukuthi kunomlisa waseGoli onomazisi onemininingwane efana neyami.
“Ngitshelwe ukuthi ukuze ngizosizakala, kumele ngenze omunye umazisi. Ngiwenzile (ngawo u-Epreli nyakenye), kangazi ukuthi yinike manje ebambe ukuba ubuye ngoba ngitshelwe ukuthi uzobuya emuva kwezinyanga eziwu-6.
“Sekuphele unyaka wonke ngigqigqa kula mahhovisi kodwa lutho usizo. Bengihlela ukushadelwa ngoDisemba kodwa uma indaba kamazisi wami ingalungi, kusho ukuthi ngeke kwenzeke lokho,” kusho uMnu Ndebele.
Okhulumela uMnyango wezaseKhaya KwaZuluNatal, uMnu Cyril Mncwabe, uthe: “Umnyango uzophenya kabanzi ukuthi ngabe yini ebambe ukuba umazisi kaPhilani ubuye. Odabeni olufuze lolu kuyenzeka ukuba umazisi ubambeke ngenxa yokuthi abomnyango bethungatha umlisa waseGoli ukuze inkinga ilungiseke ngendlela okuyiyo,” kusho uMnu Mncwabe.