Ungakoteli ngomunye umuntu uma ufuna ukuvelela
SINGABANTU emhlabeni siyathanda ukuba kukhulunywe kahle ngathi futhi ngeke wakubalekela ukuthi kumnandi ukuzwa abantu bekhuluma kahle ngawe.
Kuyaphoxana futhi kubuhlungu ukuzwa ukuthi kunabantu abakhuluma kabi ngawe. Kubuhlungu ukuthi uma wenze into enhle abantu bangakuncomi kodwa kuthi uma wenze iphutha bese bema ngalo.
Kule ngosi yanamhlanje ngizothanda sike sibheke noma sikhuze umhlola wokuthi kwenziwa yini ukuba uma umuntu enze kahle kaningi sithule singanaki, abanye kuvuke umona ubalume, abanye kungalaleki ngoba bahlale bebheke iphutha olenzayo.
Kangifuni ukukhuluma kakhulu ngabantu abafushane ngokwempumelelo, abathandayo ukuthi ukuze bavele bese begibela ngamaphutha abanye abantu. Uma ufuna ukuvela emhlabeni, ungabokotela ngomunye umuntu.
Ngiyesaba uma kunomndeni okwenzela itiye, kanti kwenziwa itiye nje, sekukhona inkulumo oyiqalile ngomunye umuntu. Kakumiwa ngomuntu.
Ungagibela esihlahleni, ugibele imbongolo nehhashi, kodwa ungami ngegama lomuntu. Ngiyesaba uma sizohleka kanti sihleka nje, simi phezu kwezinyembezi noma phezu kwephutha lomuntu.
Uma ugiya, giya udanse utshekedule kodwa ungagiyi ngethambo lomunye umuntu. Uma usukhulile ngokwempilo, usuwuhambile umhlaba, ugcina ungasajatshuliswa nawukuwa kwesitha sakho ngoba kawazi ukuthi impilo wena ikuphatheleni kusasa.
Makubuye ubuntu singabantu, singadlulwa yizilwane. Namhlanje uthola izindaba ezihlasimulisa umzimba abantu benza into nezilwane ezingasoze zayenza. Ungaka nje, ngeke uthole inja endala idlwengula umdlwane.
Ngeke ubone iqhude lijaha ichwane kodwa singabantu indlela ubuntu esebuphele ngayo, uzozwa kuthiwa indoda endala eneminyaka ewu-50 ubudala, idlwengule ingane eneminyaka emibili.
Masibheke singabantu ukuthi konakele kuphi, kodwa ngiyolokhu ngasho ukuthi mhlazane ufishi uxabene namanzi, uyothola igama elihle elithi lucky star. Ukuphila kukafishi kusemanzini, kawusoze waphila ngaphandle kwawo, kodwa amanzi angaphila ngaphandle kwawo.
Ngiyesaba-ke uma umuntu exabana esuka kumenzi wakhe, uNkulunkulu. Yonke le nto esiyibona yenzeka emhlabeni, masingakubalekeli ukuthi kwenziwa wukuba sixabene noMvelinqangi. Thina singama-Afrika, indlu emnyama, sasikholwa, ukukholwa akufikanga nabelungu.
Besazi ukuthi ukhona owavela kuqala simbiza ngoMvelinqangi. Ngisho nomkhulu bethu babazi kahle ukuthi uma inkinga isi- hlule abantu abadala kwase kufuneka bayidlulisele ekomkhulu womkhulu, bembiza ngoNkulunkulu.
Sengiphetha, ake sibheke ezikoleni ukuthi mhla kususwa imithandazo izingane zaba njani, sibheke uma kuyimpelasonto ukuthi uma singavuki siye ezinkonzweni amadoda namakhosikazi kwaba njani.
Kazikho izingane eziyophumelela kanti zixabene nabazali futhi abekho abazali nesizwe esiyophumelela kanti sixabene noNkulunkulu.
Uma sisaxabene noNkulunkulu, ubuntu buyophela. Siyindlu emnyama asike sifunde ukushayelana izandla, singashayani ngezandla, singakubalekeli ukuthi kudala ngezikhathi zobandlululo, ubuthandaza uze uthandazele umqashi wakho uVan Wyk.
Bangakanani manje abathandazela abaqashi babo babantu abamnyama? Elokugcina, uma ngabe umuntu exabene noNkulunkulu, uhlale ebona amaphutha abanye abantu, egiya ngawo, kodwa uma ngabe umuntu ebuyisene noNkulunkulu uhlale ebona amaphutha akhe afihle iziphambeko zabanye abantu. Olungileyo uyosibekela ihlazo likamakhelwane wakhe.
UPastor Sthembiso Zondo ngumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA