Kakusizi ukuhoxisa inxusa lethu kwa-Israel
ISINYATHELO seNingizimu Afrika sokuhoxisa inxusa layo kwa-Israel, ngoba ikhononda ngokubulawa kwababhikishi basePalestine ababalelwa ku-60, bebulawa ngamasosha akwa-Israel, sivusa umbuzo othi ngabe lesi sinyathelo sizosiza kanjani ukudala uxolo kuleya ngxenye yomhlaba. Laba babhikishi bebezama ukweqa umngcele, bangene kwa-Israel ngosuku lapho i-United States of America ibivula khona ihhovisi lenxusa layo edolobheni iJerusalem, ilisusa eTel Aviv lapho belizinze khona iminyaka eminingi, kusukela kwasungulwa i-Israel.
Kulo leli sonto i-Israel beyigubha iminyaka engu-70 yasungulwa. Kuyinto eyaziwayo ukuthi i-ANC nohulumeni ewuholayo badlelana namaqembu alwela inkululeko yabasePalestine, osekwenza ukuba ubudlelwano baleli ne-Israel bungabi buhle ngoba leli ligxekwa ngokuthi licheme udede nabantu basePalestine kulo mbango wezwe weminyaka eMiddle East.
Okuphawulekayo wukuthi emazweni onke kube yiNingizimu Afrika neTurkey kuphela abanqume ukuhoxisa amanxusa awo kwa-Israel. Isinqumo seTurkey sona kase thusi ngoba vele inobudlelwano obunzulu nabantu basePalestine ngokwenkolo yabo. Umbuzo ovelayo lapha uthi yini eyenze ukuba sinqume ukuthatha lesi sinqumo esinqala kangaka esikhathini lapho cishe umhlaba wonke uqoke ukukhononda ngokufa kwabantu basePalestine, kodwa wangawahoxisa amanxusa awo.
Iqiniso wukuthi umhlaba ugcwele izimpi, futhi kunokunyathelwa kwamalungelo abantu abamsulwa, okuyisimo esingemukeleki. E-Afrika, eLibya nje, abantu abampisholo abasuke bedlula khona belibhekise e-Europe ngoba bebalekela izimpi emazweni abo kuleli lizwekazi, kade bedayiswa “ezimakethe” isidana ukuba babe yizigqila zabantu bakhona.
EBurundi, eDemocratic Republic of Congo naseSouth Sudan, sekufe izinkulungwane ngezinkulungwane zabantu bakhona ezimpini zangaphakathi, ukubala nje amazwe ambalwa kwamaningi abhekene nezimpi. Naphezu kwalezi zimo ezinzima zokubulawa kwabantu abangenacala, iNingizimu Afrika kayikaze ihoxise amanxusa ayo kula mazwe ukukhombisa ukungenami kwayo. Ngabe lokhu kusho ukuthi ukubulawa kwabampisholo ngabampisholo kula mazwe abalwe ngenhla kakubalulekile yini kangako kuhulumeni wethu na?
Umbango phakathi kwe-Israel nePalestine kufanele ulungiswe ngoxolo nokuxoxa njengoba kwenzeka kuleli, hhayi ngodlame oludala ukufa kwabantu abangenacala. Ukuduba, sihoxise inxusa lethu kwa-Israel, ngeke kubasize ngalutho abantu bakuleli, futhi ngeke kujike isimo esikhona phakathi kwezinhlangothi ezibangayo eMiddle East.
Iqiniso abanye bethu abangaliqondi wukuthi iNingizimu Afrika yizwe elincane kabi ekubalulekeni nasemnothweni womhlaba, ngakho isinqumo sethu ngeke sibe nomthelela wokuxazulula inkinga ekhona phakathi kwalezi zizwe ezimbili.
Kufanele uhulumeni wethu ujwayele ukulungisa isimo eduze nasekhaya ngaphambi kokuba ubheke ukungenelela emazweni akude, ukuxazulula izinkinga esezibekhona iminyaka zehlula ongoti abahlonishwayo.