YAQALA KANJANI LE NDABA?
UMNU Nathi Nkomzwayo, oyiChief Executive Officer (CEO) yale projekthi, uthi uMasipala wesiFunda Ilembe - owengamele omasipala abancane, owaseNdwedwe, iMandeni, iKwaDukuza nowaKwaMaphumulo - unophiko lwawo olujutshwe ukuthuthukisa umnotho kulesi sifunda olubizwa nge-Enterprise iLembe.
Ngokwalo mbono, mithathu imikhakha eyizinsika ezimise umnotho walesi sifunda: ezolimo, izimboni nezokuvakasha.
(1) Ezolimo zinezigaba ezimbili, esokuhweba njengoba kwenzeka ngokutshala umoba, nesokuziphilisa komphakathi ( subsistence agriculture).
(2) Ezamabhizinisi ezihamba phambili yimboni kashukela neyokwenza iphepha kanjalo nesizinda sezimboni KwaSithebe.
(3) Ezokuvakasha kulesi sifunda phakathi kokunye kunezindawo ezinomlando ( cultural and heritage), ezemvelo namabhishi.
Kukulesi sigaba sezolimo lapho i-Enterprise iLembe iqale umsebenzi wokuzwa amanzi ngobhoko ukuthi amagilebhisi angalunga yini lapha ukuze kube nemboni yokukhiqiza iwayini. Kuyaziwa ukuthi kuze kube lapho kuqalwa lo mbhidlango, indawo ngokwesimo sayo sezulu okwaziwayo ukuthi siyayivuna le mboni kuseWestern Cape.
“Phela lapha KwaZulu-Natal inkinga ekhona ngeyokuthi imvula itholakala ehlobo kanti lokho kudala ukuba isivuno silinyazwe wukukhutha ( fungi)‚" kusho uMnu Nkomzwayo.
Ukuze lo msebenzi ube yimpumelelo, i-Enterprise iLembe ilande uMnu Daniel Maerkl, ongungoti oneziqu zasenyuvesi emkhakheni wokukhiqizwa kwewayini. Kutholakale ukuthi lukhona uhlobo lwamagilebhisi olungalunga kulesi simo sezulu esikule ngxenye yeNingizimu Afrika, okungawohlobo lokwenza iwayini elimhlophe.
Ngo-2013 uhulumeni waKwaZulu-Natal, phansi komnyango wezokubusa ngokubambisana nezomdabu, utshale u-R19,5 million kulolu hlelo, okuyisamba esiqondene nokutshalwa kwesinwazi ezindaweni ezisemakhaya, eNdwedwe nakwaMaphumulo. UMNU Nkomzwayo uthe lona wumsebenzi wobambiswano oluyingqayizivele lapho kuthi umphakathi wasemakhaya uthola amathuba emisebenzi futhi ube unikezwa ulwazi kulo mkhakha, okuyothi kamuva umsebenzi wethulwe kuwona uma usuzihlelile waba ngama- co-operative.
Ukutshala kuqale ngonyaka ka-2010, okwenze isivuno sokuqala satholakala ngo-2013 - njengoba kuthatha iminyaka emithathu ukuba kutholakale isivuno samagilebhisi. Kuthiwa lolu hlobo amandla alo okudaka (alcohol) aphansi, ngakho likulungele ukuphuzwa kanye nesidlo sasemini.
Libuza ILANGA ngohlobo lwabathengi obhekiswe kubo lomkhiqizo nentengo yewayini, uthe okwamanje okwentengo wumsebenzi ozoba semahlombe alabo abazolisabalalisa, bona babheke kakhulu izivakashi okuzothi uma zidlula lapha, uhambo lube ne-ngxenye yokunambitha iwayini elenziwe lapha kusuka phansi kuze kufike lapho selilungele ukuphuzwa.
Kwethenjwa ukuthi nxa konke kuhamba kahle, leli wayini lingagcina selithengiselwa amazwe angaphandle. Uma ebuzwa ngegama laleli wayini elingavamile elithi Seventeen87, uMnu Nkomzwayo uthe njengoba isifunda lesi sibizwa ngeLembe, babone kungcono ukuba leli wayini lethiwe ngonyaka okwazalwa ngawo iLembe, iSilo uShaka.
UMnu Maerkl uthe wethemba ukuthi ngokuhamba kwesikhathi kuzozanywa ukuba kube nezinye izinhlobo zamawayini ezizotholakala kule ndawo. Njengoba iSeventeen87 iphumele okokuqala eshashalazini ngesikhathi kuneTourism Indaba, uMnu Nkomzwayo uthe wethemba ukuthi sekuzovela ithuba lokuba laziwe, nendawo ihlomule ohlelweni lwezokuvakasha.
Uthe ngeke kusafana nalapho izihambeli bezehla zifika eshashalazini lezindiza, iKing Shaka, zingene ezimotweni zibheke edolobheni iTheku, kuphele kanjalo.
Okwamanje endaweni okuvutshelwa kuyona iSeventeen87 kunemiphongolo ewu-6.