GALAKAJANA:
ABANTU abangezwani namanzi kakumele bagibele amabhasi nezitimela ngoba phela bahlukumeza umphakathi. Njengoba uhulumeni uhlongoza ukushaya umthetho omusha ozokwenza kube yicala ukubhema usikilidi, ipipi noma imboza ezindaweni ezisetshenziswa wumphakathi, kumele kushaywe omunye futhi umthetho ozokwenza kube yicala ukunukela umphakathi.
Phela uma usushayiwe lo mthetho omusha ozokwengamela ukubhenywa kogwayi, abantu bazovalelwa ejele izinyanga ezintathu uma betholwe bebhema erenke yamatekisi namabhasi, eziteshini zezitimela, ngisho nasezindlini zangasese ezisetshenziswa wumphakathi imbala.
Kusho ukuthi ababhemi sebeyobhema emakubo kuphela, futhi babheme ngaphandle egcekeni uma benabantwana. Kusho ukuthi abanumzane abafuyile sebeyobhema esibayeni noJamludi noWolintshi, benukelwa wubulongwe.
Masibuyele kulaba bantu aba- nuka iququ. Bengigibele isitimela, lesi abathi yiGautrain, ngiya esikhumulweni sezindiza i-O.R Tambo ekuseni ngovivi izolo. Umuntu kumele avuke ngehora lesine ukuze ageze kahle futhi aziphaqule, anuke kamnandi.
Ngithe ngifika esiteshini, ngathola sekugcwele. Safika isitimela, nakhuya nami sengizitholela ikhona ebelinezihlalo ezimbili ezingenamuntu, ngahlala nganethezeka.
Kuthe ingakavaleki iminyango kwangena indoda ebigqoke la masudi acwebezela sengathi agcotshiswe uVaseline, yathi voshosho lapha eduze kwami.
Ngiqalwe yikhwapha nje zisuka, kwathi uma iwuvula umlomo ibingelela kwangathi kufele igu- ndane emlonyeni.
Sixoxile khona ngoba kuyaxoxwa. Ithe uma ingibheka, ibona le sudi ebengiyigqokile nontanjana, yacabanga ukuthi ngifanelwe ukuba ngumuntu wezombusazwe.
Ibe isibuza imibuzo nje ephathelene nezombusazwe, ikhuluma phela nangalaba bantu ababulawelwa izikhundla. Ingibuze ukuthi imisebenzi ikhona yini kulezi zombusazwe, ngase ngiyaxakeka nje ukuthi yinhloboni yomsebenzi ebikhuluma ngayo.
Ithe uma ingitshela ukuthi yona isebenza nezinkabi, kwase kucaca ukuthi ibona amathuba njengoba kubulawana nje kwezombusazwe.
Phela imisebenzi ithe ukunqaba kancane kwezamatekisi njengoba kusathulekile nje. Sithe sifika esiteshini esilandelayo bese sihleka siveza elomhlathi, senganyelwe yilo leli phunga layo lamakhwapha nelokunye nje okufihlekile. Bese ngibona nje ukuthi ngizophathwa wumdlavuza wamakhala.
Kuso leso siteshi, kungene enye intokazi ebeyiziphaqule ngesiqholo esibiza izinyosi le kude KwaMhlabuyalingana.
Kwamane kwahlangana isitete nje sesiqholo esinuka izimbali nekhwapha, kwajiya. Intokazi lena ithe uma ilizwa leli khwapha ebelingibulala, yangithi nhla ngeso, yambuka lo mlisa yanikina ikhanda. Yena akakubonanga lokhu ngoba ubesaqavuza, egijima namahlaya akhe esezibona enguS’khumba Hlophe wodumo.
Ubengaboni ukuthi kithi ihlaya elikhulu bekuyile sudi yakhe ecwebezelayo nephunga leqaqa alimboze ngayo. Besihlekela ngaphakathi, sihleka ngamehlo nodade lona ukuze angasiboni.
Ngithe uma ngibatshela ukuthi njengoba umhlaba wonke usuphe- thwe ngoshayasbhamu abafana noMengameli waseMelika, uDonald Trump nalo mholi waseSirayeli, uBenjamin Netanyahu, izinkabi sezinamathuba amaningi, kwahleka igumbi lonke lesitimela.
Phela uNetanyahu lona amasosha akhe adubule abulala abantu abevile emashumini ayisihlanu ngesikhathi bebhikisha emngceleni waseGaza owehlukanisa amaJuda namaPalestine.
Phela ezombusazwe manje sezifana ncamashi nemboni yamatekisi akuleli. Uma ungavumelani neziqhwaga, udliwa yinganono.
Bengithi ngizojoyina enye yezinhlangano ukuze ngizithole nami sengilala emabhentshini ePhalamende, kodwa umama wasekhaya uthe usangithanda ngakho-ke mangiqhubeke nemidwebo, ngikhohlwe ngezombusazwe.
Bekuthi ake ngilume indlebe le nsizwa ngamanzi nangeziqholo ezinuka kamnandi, kodwa ngazibamba ngoba phela njengoba isebenza nezinkabi, ngingazithola sengidabula amafu.
Uma iwuvula umlomo ibingelela, ubungathi kufele igundane...