I-RUSSIA ENGOZINI YOKWENZEKE KWI-BAFANA BAFANA
NJENGOBA seyisongwa imidlalo yamaligi ehlukene emhlabeni yesizini ka-2017/18, wonke amehlo asethe njo emidlalweni yeNdebe yoMhlaba ezoqala ngoLwesine lomhla ka-14 kuNhlangulana (June) isongwe ngeSonto mhla ka-15 kuNtulikazi (July) kophezulu eRussia. Sinqume ukukubhekela ubuthaka nalapho amazwe eqine khona ngokwamaqoqo adidiyelwe kuwona. Kulokhu sizobheka kwiGroup A, okuboshelwe kuwona iRussia, iSaudi Arabia, i-Egypt neUruguay. Leli lizwe libe nenhlanhla yokungaqhathwa namazwe athathwa njenganzima kakhulu kulo mqhudelwano ngenxa yebhodwe ebelikulona. Kumazwe agwenywe yiRussia kungabalwa iBrazil, iGermany namanye amaningi. Yize iRussia ikwazile ukugwema izinkunzi, kodwa ukuboshelwa eqoqweni elilodwa ne-Egypt kubukeka kuzoyifakela enkulu ingcindezi.
I-Egypt inethemba lokwenza kahle kulo mqhudelwano ngemuva kokugila izimanga kukaMohamed Salah odlala kwiLiverpool yase- England. Lo mdlali uqokwe njengovelele kwiEnglish Premiership kule sizini. Yize iRussia izokuba nenhlanhla yokuba nabalandeli abaningi kulo mqhudelwano njengoba ingosokhaya, ngeke kube lula ukucanasa kuleli qoqo njengoba i-Uruguay igabe ngabadlali abani- ngi abanesipiliyoni sokudlala kumaligi amakhulu ase-Europe.
IRussia engajwayele ukuhamba ibanga elide kulo mqhudelwano, izobhekana neSaudi Arabia ngoLwesine lokuvulwa kwalo mqhudelwano eMoscow okuyinhlokodolobha yakuleliya lizwe.
IRussia isengozini yokungena emlandweni omubi oqoshwe yiNingizimu Afrika ngokuba yizwe lokuqala ukuwasha ijezi ekuseni ekubeni ingosokhaya. Lo mlando elakuleli liwuqophe ngo-2010 kanti labe lididiyelwe eqoqweni elilodwa ne-Uruguay, iMexico neFrance.
Sesisonke isikwati saseRussia sabadlali abangu-28 abasazohlungwa simi kanje: Igor Akinfeev, Vladimir Gabulov, Soslan Dzhanaev, Andrey Lunev; Vladimir Granat, Sergei Ignashevich, Fedor Kudryashov, Ilya Kutepov, Roman Neustadter, Konstantin Rausch, Andrey Semenov, Igor Smolnikov, Mario Fernandes; Yuri Gazinskiy, Alexsandr Golovin, Alan Dzagoev, Alexsandr Erokhin, Yuri Zhirkov, Daler Kuzyaev, Roman Zobnin, Alexsandr Samedov, Anton Miranchuk, Alexsandr Tashaev, Denis Cheryshev; Artem Dzyuba, Aleksey Miranchuk, Fedor Smolov, Fedor Chalov.
IRussia icijwa nguStanislav Cherchesov, kanti iteketiswa ngeleSbornaya. Ukuvula nosokhaya kweSaudi Arabia, kubukeka kuwamfimfisa kakhulu amathuba okudlulela emzuliswaneni olandelayo njengoba kuyilona lizwe elinomlando ongatheni kuleli qoqo. Leli lizwe kakukho okutheni eselike lakuzuza kulo mqhudelwano. Kubukeka kuzokuba nzima ukubhekana neRussia engosokhaya, i-Egypt egabe noSalah ne-Uruguay yona ethembele kakhulu kuLuis Suares.
Asikakamenyezelwa isikwati seSaudi Arabia, kodwa ihambe nabadlali abangu-27 ukuya ekhempini eSpain. ISaudi Arabia isigijime emidlalweni yomhlaba amahlandla ayisihlanu kusuka ngo-1994, 1998, 2002, 2006 no-2018. Ukaputeni weSaudia Arabia, u-Osama Hawsani, usanda kulibeka ngesihloko elokuthi i-Egypt ngelinye lamazwe abawasaba kakhulu ngenxa yebhola layo eliyingozi. ISaudi Arabia iphekwa nguJuan Antonio Pizzi, kanti iteketiswa ngeleGreen Falcons. Leli lizwe lingelinye labhekwe ukuba lindizisele phezulu ifulegi lase-Afrika kulo mqhudelwano. I-Egypt kayijwayele ukubamba iqhaza kulo mqhudelwano njengoba izokube iwugijima okwesithathu. Idlale ngo-1934 nango-1990, njengoba isizowudlala nonyaka. Leli lizwe lidonsa kanzima ukungena kulo mqhudelwano nje, belivamise ukuzenzela ebholeni lase-Afrika.
Ukuba khona kukaMohamed Salah, kulindeleke ukuba kulenyuse kakhulu izinga le-Egypt. Lo mdlali usematheni emhlabeni njengoba eqokwe njengovelele kwi-English Premiership. Kungenzeka azibeke ethubeni lokuqokwa njengomdlali oqavile emhlabeni, yinqobo nje uma ezakhe iLiverpool zingakwazi ukunqoba i-Uefa Champions League ezizodudulana kowamanqamu wayo neReal Madrid yaseSpain mhla ka-26 kwephezulu eKiev, e-Ukraine.
Sesisonke isikwati se-Egypt sabadlali abangu-35 esisazohlungwa kusale abangu-23 simi kanje, onozinti: Essam El Hadary (Al Taawoun, Saudi Arabia), Sherif Ekramy (Al Ahly), Mohamed El Shennawy (Al Ahly), Mohamed Awwad (Ismaily) no-Amer Amer (Al Intag Al Harby).
Izitobha: Ahmed Fathy (Al Ahly), Ahmed Elmohamady (Aston Villa, England), Mohamed Abdel Shafy (Al Fateh, Saudi Arabia), Ahmed Hegazi (West Bromwich Albion, England), Omar Gaber (Los Angeles FC, USA), Ali Gabr (West Bromwich Albion, England), Saad Samir (Al Ahly), Karim Hafez (Lens, France), Ayman Ashraf (Al Ahly), Mahmoud Hamdy (Zamalek), Amro Tarek (Orlando City, USA) noHamada Tolba (Al Assiouty).
Abasesiswini: Mohamed Elneny (Arsenal, England), Abdullah El Said (KuPS, Finland), Mahmoud Abdul Razek “Shikabala” (Al Raed, Saudi Arabia), Mahmoud Hassan “Trezeguet” (Kasimpasa, Turkey), Ramadan Sobhi (Stoke City, England), Tarek Hamed (Zamalek), Hossam Ashour (Al Ahly), Sam Morsy (wigan Athletic, England), Amr Warda (Atromitos, Greece), Moamen Zakaria (Al Ahli Jeddah, Saudi Arabia), Walid Suleiman (Al Ahly) noMahmoud Abdel Aziz (Zamalek). Abagadli: Mohamed Salah (Liverpool, England),
Mahmoud Abdel Moneim “Kahraba” (Al Ittihad, Saudi Arabia), Marwan Mohsen (Al Ahly), Amr Gamal (HJK Helsinki, Finland), Ahmed Hassan “Kouka” (Sporting Braga, Portugal) noAhmed Gomaa (Al Masry).
I-Egypt icijwa nguHector Cuper, kanti iteketiswa ngele-The Pharaohs. Leli lizwe lisadlale amahlandla ali-12 kulo mqhudelwano, kanti sekubalwa iminyaka ligcine ukuwunqoba. I-Uruguay yiyona ezibule lo mqhudelwano ngonyaka ka-1930 ingosokhaya ihlula i-Argentina kowamanqamu. Iphinde wayadla ubhedu ngonyaka ka-1950 ihlula iBrazil. Leli lizwe libalwa namanye adlala kahle kulo mqhudelwano, kodwa bese ephelelwa ngamandla uma sekubhekwe entanjeni.
Nakulo nyaka kulindeleke ukuba i-Uruguay ithembele kuLuis Suarez ongumgadli weBarcelona yaseSpain. Ngaphezu kwalokhu, i-Uruguay igabe ngenqwaba yabadlali asebemnkantshubomvu abagijima kumaligi amakhulu aseEurope.
Sesisonke isikwati se-Uruguay sabadlali abangu-26 abasazohlungwa sididiyelwe kanje, onozinti: Fernando Muslera (Galatasaray), Martin Silva (Vasco da Gama) noMartin Campana (Independiente).
Izitobha: Diego Godin (Atletico Madrid), Sebastian Coates (Sporting CP), Jose Maria Gimenez (Atletico Madrid), Maximiliano Pereira (FC Porto), Gaston Silva (Independiente), Martin Caceres (Lazio) noGuillermo Varela (Penarol).
Abasesiswini: Nahitan Nandez (Boca Juniors), Lucas Torreira (Sampdoria), Matias Vecino (Inter Milan), Federico Valverde (Real Madrid), Rodrigo Bentancur (Juventus), Carlos Sanchez (Monterrey), Giorgian De Arrascaeta (Cruzeiro), Diego Laxalt (Genoa), Cristian Rodriguez (Penarol), Jonathan Urretaviscaya (Monterrey), Nicolas Lodeiro (Seattle Sounders) noGaston Ramirez (Sampdoria).
Abagadli: Cristhian Stuani (Girona), Maximiliano Gomez (Celta Vigo), Edinson Cavani (PSG) noLuis Suarez (Barcelona). I-Uruguay iqeqeshwa ngu-Oscar Tebarez, kanti iteketiswa ngele-La Celeste.