Kubanjwe umoya ngongcwabe iChiefs
IFree State Stars ilinyalelwe yisilomo
IFREE State Stars ibambe umoya ngomdlali oqhathe uSteve “Mphathi” Komphela nabalandeli beKaizer Chiefs abavuke indlobane emuva kokuba eqobele amagoli amabili awashise ijezi iziMpofana kwiNedbank Cup.
ILANGA lithole ukuthi iStars ingase igijime owamanqamu weNedbank Cup neMaritzburg United ngoMgqibelo ngo-19h00 eCape Town Stadium, ngaphandle kukaHarris Tchilimbou ( osesithombeni) ongumgadli odabuka eCongo.
ULuc Eymael ocija iStars, utshele ILANGA ukuthi ubamba eyeka njengoba elinyalelwe nguHarris oyisethenjwa sezakhe. Uthi ukulimala kwalo mgadli kungase kuyithikameze kakhulu ikilabhu yakhe kwazise wenza izinto zibukeke zilula ensimini njengoba nenethi eyiboniswa.
Nokho uthi unethemba lokuthi odokotela bekilabhu bazomtshela izindaba ezimnandi ngalo mgadli kusasa ngoLwesihlanu.
“Obekubaluleke kakhulu siqala isizini bekuwukugcina indawo yethu kwiPremiership. Abadlali bami kabanayo ingcindezi yokunqoba owamanqamu.
Nokho kumele balwele isithunzi sekilabhu. Ukuba kowamanqamu kusho lukhulu kubona kwazise abaningi bebengasiniki lutho kule sizini.
“Ngizobhekana nekilabhu enzima kakhulu, eshoshelayo phambili. Lokhu kufakazelwa wukuthi iningi labadlali bayo bazihlomulela kalula imiklomelo yeAbsa Premiership. Uma singanqoba iNedbank Cup singavulekelwa wumnyango wokuyodlala kwiCaf Confederation Cup engikholwa wukuthi kungayisiza kakhulu iBafana Bafana.
“Empeleni imiqhudelwano yeCaf akumele abaqeqeshi baseNingizimu Afrika bayithathe kancane, imqoka kakhulu ngoba inyusa umsebenzi osuwenzile ebholeni,” kusho u-Eymael oseke wayibamba emakilabhini amaningi ahlonishwayo e-Afrika kubalwa i-AS Vita yaseDemocratic Republic of Congo (DRC).