ULWELA UKUBA YISIBONELO ENTSHENI
UGEQA amagula uSiyanda “Magazi” Xulu (27) oyisiqongqwane seMaritzburg United ngokumenze waphenduka insika kule kilabhu enomdlalo obucayi wamanqamu weNedbank Cup ezowugijima neFree State Stars ngoMgqibelo ngo19h00 eCape Town Stadium, eCape Town.
UXulu utshele ILANGA ukuthi okumqoka okumenze kwabuya ifomu yakhe, wukuziphatha kahle ngaphandle nangaphakathi enkundleni.
“Nakuba ube mkhulu umehluko ngisuka emakilabhini amakhulu iMamelodi Sundowns neKaizer Chiefs, ngiqoma iTeam of Choice, kodwa ngikhethe ukudlala ngokuzinikela ukubuyisa isithunzi sami ebholeni. Abantu abaningi bese bengabaza ikhono lami ebholeni.
“IMaritzburg ithande uXulu kuphela, yakhohlwa yizindaba ebizizwa ngami zangaphandle kwenkundla. Uma ubheka ukungena eqenjini elincane kunengcindezi yakho nakho kwazise abantu aban- ingi basuke belindele ukhilimu womdlalo uma usuka emakilabhini amakhulu.
“Phela amakilabhu amancane imvamisa kawabi nabadlali asebenesikhathi eside ebholeni. Bengizimisele ukufunda okuningi kuFadlu Davids. Ukuzodlala kwiTeam of Choice kuyiguqule kakhulu impilo. Ngifisa impilo yami ibe yisifundo kubafana abancane abasakhula ebholeni.
“Yingakho ngizibekele umthwalo wokubamba iqhaza elikhulu ekukhuliseni abadlali abancane abakhona eqenjini njengoSiphesihle Ndlovu noBandile Shandu engibabona benekhono elibabazekayo ebholeni lakuleli. Isikhathi esiningi ngisichitha nabo ukuze bancele ulwazi nangezingqinamba ezikhona ebholeni,” kusho uXulu ogcizelele ukuthi usakufisa ukubuyela e-Europe njengoba eke walihlikihla eRussia phambilini.
Qaphela! Funda kabanzi ngempilo kaXulu yangasese engosini iNgaphandle kweNkundla kwiLANGA LangeSonto.