INGASE IHLABANE NGEMIDLALO KAZWELONKE I-KZN

INGASE ihlabane ngemidlalo emqoka kazwelonke iKwaZuluNatal ngaphansi kweSouth African Football Association (Safa) neSouth African Schools Football Association (Sasfa).

UKwenzakwakhe Ngwenya wemiqhudelwano yeSafa esifundazweni, utshele leli phephandaba ukuthi iKwaZuluNatal yiyona ezosingatha imidlalo kazwelonke yeSAB League.

Lesi sifundazwe sihlongoza ukuba le midlalo igijinyelwe eKing Zwelithini Stadium, eMlazi.

Izokuba ngoNtulikazi (July), kodwa azikanqunywa izinsuku. IKwaZulu-Natal ibibanga igunya lokusingatha le midlalo ne-Eastern Cape ebifuna ukuyikhomba eBhayi.

Kwenzeka lokhu nje, ubuholi obusha beSasfa esifundazweni, sebuphume umkhankaso wokufuna igunya lokusingatha imidlalo kazwelonke yeMcDonald U/14.

Lokhu kuqinisekiswe nguZibuse Ncube onguSihlalo okhethwe ngeledlule eThekwini.

Eminye imidlalo yezikole sekucacile ukuthi izokuya kuphi njengoba eyeDanone izokuba seGauteng kuthi eyeCoca-Cola idlalelwe e-Eastern Cape.

UKiller Mkhwanazi noBonginkosi Madlala baqokwe njengamasekela kasihlalo, kanti uSmanga Mgenge ubuyiselwe esikhundleni sokuba nguNobhala kwathi uSibongiseni Nzama wakhethelwa ukuba lisekela lakhe.

USibusiso Ntshangase uqokwe njengoMgcini-mafa, kanti obhekele izinhlelo zentuthuko nguMusa Khulu bese kuthi abesifazane bamelwe nguNobuhle Dladla noNomthandazo Mpanya.

Laba baholi abasha beSasfa bakhethwe ngaphandle kokuphikiswa njengoba izifunda bezivumelana ngokuthi bathathe izihlalo ngokwahlukana kwabo.