Yembuleke izinqe iMamelodi Sundowns
YEMBULEKE izinqe iMamelodi Sundowns ngokuba sezingeni eliphansi kukanobhutshuzwayo waseNingizimu Afrika igaduliswa kanzima yiBarcelona yaseSpain kuba ngu-3-1 kowokuhlonipha uNelson Mandela izolo ngoLwesithathu ebusuku eFNB Stadium, eGoli.
Nakuba iBarcelona itheleke kuleli izolo ngoLwesithathu ekuseni, kodwa inike iSundowns izifundo zamahhala zebhola sengathi ngezikaPitso “Jingles” Mosimane ezingsitholanga isikhathi sokuphumula.
Amagoli eBarca abhakuziswe enethini ngu-Ousmane Dembele ngomzuzu ka-3, uLuis Suarez ngoka-19 nelika-Andre Gomes ngoka-67. Elokugqiba ihlazo leDowns lize noSibusiso Vilakazi ngoka-76.
IBarcelona iphindele eSpain ngemuva kwalo mdlalo ukuyolungisela owokusonga iSpanish La Liga neReal Sociedad ngeSonto ngo-20h45.
Nokho kucacile ukuthi iBarcelona inabalandeli abaningi umhlaba wonke njengoba iFNB Stadium ibigcwele phama abalandeli bazo zonke izinhlanga.
Izingqwele zeLa Liga, iBarca, zikhombisile ukuthi iNingizimu Afrika isezingeni eliphansi kakhulu uma iqhathaniswa namazwe asethuthukile kunobhutshuzwayo emhlabeni. IDowns idlala ingcwenga yebhola kuleli okufakazelwa wukuthi inqobe inkomishi ye-Absa Premiership ingakasongwa isizini.
Nokho akhona amathuba akhiwe yiDowns ikakhulukazi ngesiwombe sesibili kodwa kwasho khona ukuthi ibhekene nezingqungqulu kulo mdlalo. IBarcelona ibisiyehlula okwesibili iDowns kowobungani.
Ngaphezu kwalokhu, le kilabhu kaPatrice Motsepe onguMengameli, isifinyelele esigabeni samaqoqo emidlalweni yeCaf Champions League okuyizinkomba zokuthi yenza kahle.
IDowns bekulindeleke ukuba ilenyuse izinga njengoba ike yathola ithuba lokubhekana namakilabhu ahlonishwayo emhlabeni kwiFifa Club World Cup ngo-2016 eJapan, ngemuva kokudla ubhedu kwiChampions League. IDowns yiyona yodwa ikilabhu yaseNingizimu Afrika esike yadlala kwiClub World Cup edidiyela izingqwele zamazwekazi ezingeni lamakilabhu.
IBarca iqale lo mdlalo ngabadlali ababili abashiye umlando eFNB Stadium ngokwahlukana ngesikhathi seNdebe yoMhlaba ebikuleli ngo-2010.
ULuis Suarez wase-Uruguay ongumgadli weBarca, uphule izinhliziyo zabathandi bebhola baseAfrika evimba ibhola ngesandla izwe lakhe libhekene neGhana kwiquarter-final yalo mqhudelwano.
U-Andres Iniesta waseSpain, uvalele igoli elinqobise leli lizwe lo mqhudelwano lihlula iNetherlands ngo-1-0 kowamanqamu. Sekungumlando ukuthi iSpain idedele le ndebe kwiGermany ngo2014 eBrazil.