KULINDWE ISINQUMO NGOLUKA-BABES
Umndeni uzokhipha isitatimende maduze
UDABA olusematheni lukaBabes Wodumo "lokushaywa" yisinqandamathe sakhe, uMandla "Mampintsha" Maphumulo, luzodingidwa kabanzi ngumndeni kaBabes bese uphuma nesinqumo.
UZOHLANGANA namhlanje umndeni kaBongekile “Babes Wodumo” Simelane udingide ngemibiko yokuthi ubebhoklozwa yisoka lakhe, elinguMandla “Mampintsha” Maphumulo, obekulindeleke ukuba liyocela isihlobo esihle kulo mndeni ngoNhlangulana (June) nonyaka.
UBishop Welcome Simelane, uyise kaBabes, ongumholi webandla i-Apostolic Faith Mission, eMargate, utshele leli phephandaba ngomlomo womfowabo, uMnu Knowledge Simelane, ukuthi bazoluhlalela phansi lolu daba, baludingide njengomndeni bese bekhipha isitatimende ngemizwa nangesinqumo sabo njengomndeni.
Uvumile ukuthi bese kunamasonto amathathu le ntokazi ibuyele kubo ngenxa yesimo esithi masihambisane nazo lezi zinsolo.
Ihhovisi likaMnu Cele liyiphikile imibiko esabalale ngoMgqibelo enkundleni yezokuxhumana, iTwitter, ethi selizibophezele ngokuvikela uBabes.
Okhulumela uMnu Cele, uNkk Nonkululeko Phokane, uthe kabayazi le mibiko futhi bayaca- cisa ukuthi kayisilo iqiniso.
Usho lokhu ngesikhathi ebuzwa yiLANGA ukuthi likhona yini icala elivulwe nguBabes Wodumo nokuthi uzobe eqashwe ngamaphoyisa yini, uma kuwukuthi uMnu Cele ukushilo lokhu.
“Kasiyazi le mibiko ukuthi iqhamuke kuphi nobani kodwa kuyomsiza kakhulu uBongekile ukuthi ayovula icala noma enze incwadi yokumvikela ( protection
order), okuyiyona into eyenziwayo uma uyisakhamuzi saseNingizimu Afrika.
“Ihhovisi likangqongqoshe kalikwazi ukungenelela ezindabeni ezinjengalezi amaphoyisa ekhona,” kusho yena.
Kushiye abaningi bengawuvali umlomo ukuvela kwale mibiko ngoLwesihlanu ntambama lapho uMasechaba esho ngomlomo wakhe ukuthi sekunesikhathi azi ukuthi uBabes uhlukunyezwa nguMampintsha oyisinqandamathe sakhe esiphinde sibe ngumphathi wakhe.
Uqhube wathi yena usondelene nowesifazane othile oke walekelela uBabes, wamnikeza indawo yokulala ngemuva kokungqimuzwa nguMampintsha, waphinde waveza nokuthi unolwazi lokuthi uMampintsha uke waphoqoza le ntokazi umlenze.
Kwelinye lamaphephandaba esiNgisi, uyise kaBabes ucashunwe ethi yena uyakholelwa ekutheni indodakazi yakhe yindala ngokwanele, iyakwazi okuyilungele nokungayilungele.
“Njengomfundisi ngijwayele ukushumayela ngezinto ezinjengalezi futhi ngiyazi ukuthi kabukho ubudlelwano obungenazo izinkinga zabo. Ngoba uneminyaka eyevile kwewu-21, ngiyakholelwa ekutheni uzothatha izinqumo ezilungele yena,” kusho uyise kaBabes kuleli phephandaba lesiNgisi.
UMampintsha uyiphikile le mibiko, wathi usola ukuthi kunesandla sesithathu kulolu daba futhi konke lokhu kwenziwa ngoba kuyimizamo yokudicilela phansi isithunzi sakhe.
Ezinkundleni zokuxhumana ngoMgqibelo ebusuku uMampintsha ufake isithombe sengoma kaNathi ethi‚ “Buyelekhaya”, okuyilapho abalandeli bakhe abanye bekhombise ukuzwelana naye bethi makahlale emkhulekweni.
Abanye bebekhwela bedilika kuyena bethi ungumhlukumezi, kungani engavumi amacala akhe, ayeke ukucasha ngesithupha.
nonhlakaniphos@ilanganews. co.za