KUBE NEMIPHUMELA EMIHLE UKUVALWA KWETIYE KUMASIPALA
KUTHELA izithelo ukuvalwa kokudla, itiye nokulaliswa kwezimenenja emahhotela abizayo kuMasipala iGreater Kokstad, njengoba usubalwa nomaspala abahamba phambili ekwenzeni kahle kuleli.
Umphumela wokuvalwa kwalezi zinto ucace bha embikweni weRatings Afrika Agency, ophume ngeledlule lapho uMasipala waseKokstad ubaqwaqwade emakhanda abaKwaZulu-Natal ngokuphathwa kahle, wathola amaphuzu awu-76.
Engxoxweni ekhethekile neMeya yaseKokstad, uMnu Bheki Mtolo, ithe ukuvalwa kwezinto ezingenalo ushintsho empilweni yomphakathi okufana netiye, ukudla emicimbini kamasipala nokulaliswa kwezimenenja emahhotela abizayo, ngezinye ezidale ukuba isimo sezemali sibe ngcono.
Uthe lezi zinto kazinakwa, kuye kucatshangwe ukuthi zidla imali encane kodwa kutholakale ukuthi iningi imali echithwayo uma sekubhekisiswa kahle. Ukuvalwa kwalezi zinto uthe yisu abaqhamuke nalo ngesikhathi bebhekene nesimo esinzima sezimali.
Utshele ILANGA ukuthi izinkinga ezibhekana nomasipala abaningi kuleli, zidalwa wukuthi abaholi bazitshela ukuthi basebenzela uhulumeni, uma umkhumbi uzika, bazoxhaswa uhulumeni kazwelonke.
“Lowo mqondo kawulungile ngoba wenza abantu bangasebenzi ngokuzikhandla, thina la umasipala siwuphathise okwebhizinisi, sazi kahle ukuthi kufanele senze inzuzo singabheki ukuxhaswa. Ngikhuluma nje umasipala wami unamaprojekthi owenza ngemali ozenzele yona,” kusho uMnu Mtolo.
Uthe enye yezinto ezibasizayo wukuqasha abantu abakulungele ukwenza umsebenzi, hhayi ngokobungani nezihlobo.
“Lapha ngikhuluma ngabantu abakwaziyo ukuzicabangela futhi baphikise uma kunokungenelela kwepolitiki ezinhlelweni zokuphathwa kukamasipala, hhayi ovumazonke,” kusho yena. Uthe okunye okuceleka phansi omasipala wukungafuni ukulalela imibono yamanye amaqembu ngisho kucaca ukuthi ingaba wusizo.
“Abantu kufanele bazi ukuthi kasiphathisiwe lezi zikhundla ukuba sibhekelele abantu bamaqembu athile kepha siphathiswe ukuba siqinisekise intuthuko ngale kokubheka amaqembu abasuka kuwona,” kusho uMnu Mtolo.
UMnu Msawakhe Mayisela okhulumela uMnyango wezokuBusa ngokuBambisana nezoMdabu KwaZulu-Natal, uwuncomile uMasipala waseKokstad wathi: “Sikushayela ihlombe okwenziwe yilo masipala”, kusho uMnu Mayisela.