Udumele echayiswa umasipala ngomfundaze
Usengcupheni yokuxoshwa enyuvesi
UYABALISA unina womfundi owenza izifundo zobudokotela e-University of Witwatersrand eGoli, othi indodana yakhe ingase ixoshwe enyuvesi, emuva kokuba ichayiswe wuMasipala weTheku, obuyithembise umfundaze kodwa washaya ungqimphothwe ngomzuzu wokugcina sekufanele uyikhokhele.
UNkz Lindiwe Ngcobo (42), ongunina kaSthembiso Nzuza, obethenjiswe wumasipala umfundaze ngoba ethole o-A abawu-7 waphuma unombolo 1 ePinetown District, uthi indodana yakhe ingase ixoshwe esikoleni ngoba akanayo imali yokuyikhokhela.
Ekhuluma neLANGA uNkz Ngcobo, uthe indodana yakhe ngesikhathi kuklonyeliswa abafundi abenze kahle ezifundweni ngonyaka ka-2016, nayo ibiziwe e-Inkosi Albert Luthuli International Convention Centre, yaklonyeliswa. IMeya yeTheku, uNkk Zandile Gumede, nayo ibiphakathi kwabantu abebehambele lo mcimbi.
“Kulo mcimbi imeya ithembise indodana yami ukuthi izothola umfundaze, ngajabula ngizitshela ukuthi usizi luphelile. Kulo mcimbi uSthembiso uthole isheke lika-R50 000 ngokuphasa kahle zonke zifundo zakhe elinikwa ngabakwaHuawei, nelika-R15 000 alithole ngokuphasa kahle izibalo nesayensi elinikwa ngabakwaNedbank.
“Ngemuva komcimbi besilokhu sixhumana nezisebenzi zikamasipala indodana yami isithathiwe eWits, bezithi izosayiniswa inkontileka bese uqala umasipala uyikhokhela ngoba lo mfundaze ebithenjiswe wona ubuzokhokhela izincwadi zokufunda, ukubhalisa nendawo yokuhlala.
“Ngibone kuphela isikhathi ku- lokhu kuthiwa kulungiswa inkontileka, ngabathinta kwamasipala ngibuza ukuthi kuqhubekani, bathi indaba kaSthembiso basayilungisa. Kuthe emuva kwesikhathi ngaphinda ngabuza bavele bathi bahlale emhlanganweni base bevumelana ngokuthi ngeke besamsiza ngoba wenza izifundo zobudokotela, bewumasipala kabasabaxhasi odokotela.
“Basho kanjalo nje indodana yami bayibhalele incwadi kade kuphuma imifundaze ngaphakathi esikoleni bethi bewumasipala ingane yami bayinikeza umfundaze ogcwele, ingabe isazikhathaza ngokufuna omunye nempela yahlala yalinda kanti ekugcineni bazoyijikela,” kusho uNkz Ngcobo.
Uthi uma ebabuza kwamasipala ukuthi basho kanjani ukuthi kaba- baxhasi odokotela ekubeni indodana yakhe iye eWits, bazi kahle ukuthi iyokwenza izifundo zobudokotela, bathi bebebaxhasa kodwa bamile kulo nyaka.
“Okubuhlungu uphuthelwe yithuba lokuthola umfundaze kwezinye izindawo. Abantu la endaweni bebengijabulisa bethi ingane yami iphase kahle, ibibangwa yizinkampani zifuna ukuyinika umfunda- ze. Sengesaba ukuthi izoxoshwa esikoleni ngoba ingakhokhile kulo nyaka bese ize idikibala igcine ingasasifuni nesikole kanti yenze kahle kakhulu onyakeni wayo wokuqala enyuvesi,” kusho yena.
Uthi bajikile abakwamasipala bathi le mali ewu-R65 000 etholwe nguSthembiso - okuwu-R50 000 wakwaHuawei no-R15 000 wakwaNedbank - yiwona lo mfundaze abebewusho.
“Bathe lezo zinkampani zicelwe yibona ukuba zixhase,” kusho uNkz Ngcobo.
Okhulumela iMeya yeTheku, uMnu Mthunzi Gumede, uthe banomgomo bewumasipala abakhipha ngawo imifundaze.
“Umgomo wethu uthi sinika abafundi abenza izifundo ze-engineering abazobuya neziqu basize umasipala.
“UMnu Nzuza simnikile umfundaze ka-R65 000 wokukhokhela izifundo saphinda samnika u-R37 000 wokukhokhela indawo yokuhlala kwabe siyagcina.
“Siyaphoxeka ukuthi uMnu Nzuza, usesifake emaphepheni ekubeni sasimchazelile ukuthi umfundaze wodokotela kasisawukhiphi,” kusho uMnu Gumede.
ILANGA lizibonile izincwadi ezimbili ezibhalwe wumasipala, enye ebhalwe mhla ka-10 kuMasingana (January), ithi iqinisekisa eWits, ukuthi uSthembiso, unikwe i- schorlaship sika-R65 000 sonyaka sesikhokhiwe, umasipala ulungiselela ukukhokhela indawo yakhe yokuhlala.
Ebhalwe mhla ka-6 kuNhlolanja (February), ithi iqinisekisa ukuthi impela uSthembiso ungumfundi onikwe umfundaze wuMasipala weTheku, lo mfundaze ukhokhela ukufunda nendawo yokuhlala.