UKHALE NGESILINGO ODLWENGULE UMSHANA WAKHE
UKHALE ngesilingo owesilisa waseKuthuleni, eMelmoth, ogwetshwe udilikajele yiNkantolo yeMantshi yaseMpangeni ngoLwesine ngecala lokudlwengula umshana wakhe (13), ephindelela.
UMbhekiseni Mhlongo (40) - okungelona igama lakhe langempela, ukuvikela isithunzi somshana wakhe - ukhale ngesilingo athe siholele ekutheni adlwengule ingane kadadewabo ongasekho emhlabeni, obesekuphele isikhathi eside ewenza la manyala awaqale ngo-2016.
Ingane ubeyisabisa ngokuthi uzoyigenca ngocelemba uma ike yathi vu ngento abeyenza kuyona. Amalungu omndeni athi liphume nobovu ngokuthola kwakhe lesi sigwebo.
ILANGA likhulume nelungu lomndeni - esiligodlile igama lalo - eliveze ukuthi bajabule ngesigwebo esitholwe nguMbhekiseni. Lithe wenza le nto nje, ubenezinyanga eziwu-6 ephumile ejele ngecala lokudlwengula nokubamba inkunzi. Kuthiwa lo mshana wakhe abemdlwengula, uzalwe engekho esejele.
“Ubegila le mihlola nje, ubesanda kuphuma ejele, sisamjabulela siwumndeni ukuthi useze waphuma kanti kasazi ukuthi uzogila le mihlola. Efika ekhaya izingane eziningi ezincane bezingamazi ngenxa yokuthi uchithe isikhathi esiningi ejele‚” kusho leli lungu lomndeni elithi bebengalindele ukuthi angaphuma - kodwa bathukile sebembona ethushuka ethi uphume ngoshwele.
Lithi ngesikhathi uMbhekiseni esanda kubuya ejele, bebemjabulela futhi naye ekhombisa ukuthi uselungile, kungekho lutho olusolisayo.
Uqale ibhizinisi lokudayisa ukudla ezikoleni, ubethuma isisulu ukuba siyomdayisela aphinde asidobe nangemali.
“Yize besazi ukuthi umalume ubuya ejele ngecala lokudlwengula, besingazitsheli ukuthi angenza into efana nale endodakazini kadadewabo ongasekho emhlabeni,” kusho leli lungu lomndeni.
Lithi ingane ibatshele ukuthi uninalume ubendlala icansi phansi endlini yakhe ngaphambi kokuba ayidlwengule, engalisebenzisi nejazi lomkhwenyana. Bekuthi uma eseqedile ayikhiphele ucelemba ayisabise ngokuthi uma ike yaxoxela umuntu uzobulala bonke abantu egcekeni.
Iveze ukuthi uninalume ubeyicuthela uma isiyogeza ntambama, ayibambe uma isiqedile ayiphose endlini yakhe ayidlwengule.
Lokhu ubekwenza zonke izinsuku. Ilungu lomndeni lithi baqale ukusola ngesikhathi befica ingane endlini kaninalume igqoka isikhindi sangaphansi, ekhona naye uMbhekiseni kade bevalelene ilanga lishisa.
Kuthe uma beyibuza ingane, yaphika yalala ngomhlane ukuthi kukhona abebekwenza.
“Ngenxa yokuthi besesiqalile ukusola ukuthi kukhona okushaya amanzi futhi nengane besibona ukuthi iyasaba ukukhuluma, sixhumane nosonhlalakahle salubika kubona udaba, bayihlasela esikoleni ingane.
“Ngosuku abafike ngalo esikoleni, ibavezele ukuthi ngaphambi kokuba iye esikoleni ubeqale ayibambe ayitshele ukuthi uyinika umphako ozokwenza ukuthi ifunde kahle esikoleni uma eyidlwengula.
IBamba likaKhomishana wamaPhoyisa KwaZulu-Natal, uMajor General Bheki Langa, lisishayele ihlombe isigwebo esitholwe nguMbhekiseni lathi abantu abadlwengulayo bafanelwe yijele.