Kuvinjwe ungqongqoshe kubangwa umhlaba
Kuphoqeleke ukuba umcimbi uhlehliswe
KUSHODE ozogadla kuqala phakathi kwezizwe ezimbili zaKwaZulu-Natal, ezifakane enkantolo ngenxa yombango womhlaba wezwe laseDukuduku, eMtubatuba.
NgoLwesihlanu buchitheke bugayiwe ehholo eVezobala Community Hall, eDukuduku, lapho bekulindeleke ukuba abaThethwa, bebuthanele khona beholwa yiNkosi Mbusowabathethwa “Veni” Mthethwa.
Bekuhlelwe ukuba uNgqongqoshe wezokuBusa ngokuBambisana nezoMdabu kuZwelonke, uMnu Nathi Mthethwa, kube nguyena isikhulumi sosuku. Kubikwa ukuthi isimo siqale ukushuba ngoLwesine ntambama ngesikhathi onogoda ababheke ukusebenza kwehholo bekhipha ngesankahlu izisebenzi zenkampani ebiqashwe wumnyango kaMnu Mthethwa ukuyohlobisa ihholo.
Kubikwa ukuthi onogada bathinte ithimba elibhekelele ukuqashwa kwamahholo nezakhiwo zomphakathi kuMasipala waseMtubatuba, nalo elifike layalela izinkampani nengxenye yamalungu omphakathi ahambisana nobuholi besizwe sakwaMthethwa ukuba bavume umcimbi wedluliselwe kwelinye ihholo ngoba leli beliqashwe ngelinye lamaqembu ezombusazwe.
Kuthiwa isimo senyukele kwelinye izinga esethelekile ungqongqoshe, sekufanele kuqalwe umcimbi ngezithuba zehora le-10 lapho kube nesiqhoqho samadoda azichaze ngokuthi awuzalo lobukhosi bakwaMkhwanazi, athunywe ukuba ayovimba ukungena kwakhe nenkosi yakwaMthethwa, ngoba bazofunza umphakathi izinkulumo ezingelona iqiniso.
Abatshele nokuthi umhlaba waseDukuduku, ngowabaKhwanazi. ILANGA lithole ukuthi inkosi no-ngqongqoshe bahlale ezimotweni kwaze kwaphakama ilanga. Nge-nxa yokushuba kwesimo, kuphoqeleke ukuba umcimbi uhlehlise-lwe usuku olungaziwa.
UMnu Jabulani Msweli oyilungu lomphakathi, obekhona kuvinjwa ungqongqoshe, utshele ILANGA ukuthi umcimbi woniwe wukusuka kwezibhelu kubanjwana ngamawashingi phakathi kwalezi zinhlangothi. Uthi okubi wukuthi umsindo usuke kungekho ngisho nelilodwa iphoyisa.
“Mina ngeseka uhlangothi lwabaThethwa ngoba nenduna esiphethe kule ndawo, uMnu Popayi Ncube, usanda kugcotshwa yibona,” kusho uMnu Msweli.
UMnu Ntuthuko Mkhwanazi ongundunankulu wesizwe sakwaMkhwanazi, okunguyena obambe isihlalo sobukhosi bakubo, uthe abakwaMthethwa ngeke balinuke leli lizwe noma ngabe bazama ngaziphi izindlela.
Akaphawulanga lutho ngezibhelu zangoLwesihlanu. Imizamo yokuthola inkosi yakwaMthethwa, iphunzile njengoba ibingatholakali ocingweni lwayo. Beluvaliwe. ILANGA lizame kusukela ngoLwesihlanu kwaze kwaba yizolo ngeSonto, ukuxhumana noMnu Abongiwe Mbuthu obehlele lo mcimbi ngaphansi kwehhovisi likangqongqoshe, kodwa ucingo lwakhe belukhala lungabanjwa.
Nemiyalezo athunyelelwe yona akayiphendulanga. Umbango ushisa phansi kule ndawo, abakwaMthethwa bathi bafuna ukubuyisa izwe labo kusuka emfuleni uMsunduzi kuze kuyofinyelela eNkundusi, eHluhluwe.
Mina ngeseka uhlangothi lwabaThethwa...