BEKUKHONA NOZODWA KUGQUGQUZELWA OWAMAHHASHI
SEZIQALA ukuzwakala izigi zeVodacom Durban July (VDJ) njengoba ngempelasonto eYadini Lounge, bekunomcimbi wokugqugquzela abantu ukuthi sebengaqala balungele lo mcimbi odume ngengqephu, hhayi nje kuphela amahhashi asuke egijima.
Amathikithi akhona amba eqolo njengoba kuyaye kube namatende ahlukahlukene. Kuyaziwa ukuthi ukuncintisana kusuke kuphezulu kosomabhizinisi ngesikhathi seVDJ, wonke umuntu efisa itende lakhe kube ngelihamba phambili ngokugcwala abantu.
Ngale mpelasonto eYadini bekuvakashele umsakazi weMetro FM, uDineo Ranaka, owethula uhlelo iThe Bridge, olungena ngo10 ekuseni kuya ku-12 emini phakathi nezinsuku, ngokubambisana noLerato Kganyago.
Umcimbi weVDJ uzoba ngempelasonto yokuqala mhlaka-7 kunguMgqibelo njengokujwayelekile. Uyaziwa lo mcimbi ngokuhlale ugcwele osopolitiki nosaziwayo bemikhakha ehlukahlukene. UMjay Nzama ongumnikazi wale ndawo yokujabula, ugqugquzele abantu ukuba baye e- computicket bayothenga amathikithi ngoba kuzobe “kufiwa” kakhulu kulo nyaka.
Amathikithi ezicukuthwane azobe etholakala ngo-R2 250 futhi yiwona wodwa azobe edayiswa.
UDJ Webster noDJ Gukwa yibona abebeshiyelana inkundla, abantu badanse baze bakhasa phansi ubona nje ukuthi bajabule. Kumangale abantu bebona kutheleka noZodwa Wabantu kule ndawo ebese kwaziwa ukuthi akasayihambeli.
Uqale ukubonakala khona ngoLwesihlanu. Ngesikhathi ithimba likaZiyawa likhona, uZodwa ubengadansi kakhulu ngale ndlela aziwa ngayo, ubejika kancane nje eduze kwabangani bakhe abuye azimele eceleni.