Uthembisa lukhulu umbhali woZalo
UNAMAGALELO ababazekayo ekubhaleni nasekukhiqizeni imidlalo kamabonakude oqashwe njengenhloko yababhali bomdlalo owuchungechunge, Uzalo - olukhonjiswa phakathi nezinsuku kuSABC 1 ngo-20h30 - uBongi Ndaba.
UBongi ongowokuzalwa eWelkom, eFree State, kodwa okhulele i-Eastern Cape naKwaZulu Natal, uthi ukuqashwa kulo mdlalo ohamba phambili ngababukeli kuyintokozo kuyena njengoba enayo insila yaKwaMashu lapho kuqoshelwa khona lo mdlalo.
Exoxa neLANGA, uveze ukuthi bekumele awujoyine ngesikhathi uqala kumabonakude lo mdlalo kodwa ngenxa yokuthi ubenenkontileka nenye inkampani, kwangenzeka.
“Bangithintile ngesikhathi besaqala kodwa ngangakwazi ukuwujoyina. Kuyintokozo ukuthi ekugcineni sekwenzekile,” kusho uBongi.
Uzakhele udumo eyinhloko yababhali bomdlalo owuchungechunge iGenerations ngaphambi kokuba ushintshe igama ube yiGenerartions: The Legacy.
Uthi ubonga uMfundi Vundla ongumnikazi weGenerations ngokumnika ithuba lokuveza ikhono lakhe lokubhala nokukhula kulona.
“Ngiyohlale njalo ngimbonga uMfundi ngoba unginike ithuba kulo mdlalo ngesikhathi kusagcwele abelungu njengababhali kuwona‚” kusho uBongi oseke wabhala imidlalo okubalwa kuyo iGaz’lam, uMuvhango, iSociety II, iSaint and Sinners neSokhulu and Partners, ethole izindondo eziwu-7 kumaSouth African Film and Television Award (Safta).
Igalelo lakhe liphinde lagqama futhi emidlalweni okubalwa kuyona i-Ashes to Ashes neZ’bondiwe.
Uke wadlala indawo kaThembeka emdlalweni ocashunwe kokaShakespeare, iKing Lear, obizwa ngokuthi Izingane Zobaba lapho eqokwe khona emunxeni weBest Supporting Role kumaSafta.
UBongi uthi kuningi abazokwenza njengoba eseqokwe njengenhloko yababhali kuZalo.
“Okubalulekile wukubheka impilo yabantu abajwayelekile nokukhulisa izindawo zabalingisi bethu, zingagcini nje ngokudu- ma kodwa zibe nomehluko,” kusho yena.
Uveze ukuthi kuyimanje umatasa nenye ifilimu emfushane ebhalwe nguye, ethi ‚“Miracle”. Uthi nakuba bekhona ababhali nabadidiyeli bemidlalo besifazane, kodwa ithuba bayalincishwa njengoba abanikazi beziteshi bengabaniki (umsebenzi).
“Iziteshi zikamabonakude zisenenkinga nokunikeza izinkampani zabesifazane ithuba lokuzibonakalisa kulo mkhakha,” kusho uBongi enanela ngokubonga uGugu Zuma ongumnikazi wenkampani eqopha Uzalo.
“Inkampani eqopha Uzalo ngiyithanda ngoba ngeyowesifazane futhi iyabanikeza abanye ithuba lokukuzibonakalisa ngaphakathi,” kusho uBongi.