Okumele ukwazi nge-"high high"
ABANTU abadala bajwayele ukuthi noma ngabe baphethwe yisiphi nje isifo, bakhale ngokuthi bane- high high, okugcina kungasaqondakali ukuthi ngabe bayasazi yini lesi sifo ukuthi sona sihlasela kanjani emzimbeni noma izimpawu zaso.
Ngokusho kwabe- medicinenet. com, umfutho wegazi ophezulu, iHigh Blood Pressure (Hypertension), wukushaya ngamandla ( tension), kuma- artery, okuyimithambo emikhulu ethwala igazi lisuka enhliziyweni liya kwezinye izicubu zomzimba.
Umfutho wegazi ophezulu uhlukaniswa ngezinombolo ezimbili, okungengasenhla ebizwa ngesystolic blood pressure, ekhombisa ukushaya kwenhliziyo kumaartery, yi- diastolic pressure, engezansi, ekhombisa ngesikhathi inhliziyo iphumula.
Ngokwabe- medicinenet.com, umfutho wegazi ojwalelekile kufanele ube ngaphansi kuka-120/80. Ngonyaka odlule abe-American Collage of Cardiology bakhiphe imihlahlandlela emisha ngalesi sifo.
Baveze ukuthi i- blood pressure ephakathi kuka-120/80 kuya ku-129/80 iyi- elevated blood pressure kuthi esukela ku-130/80 kuyaphezulu isiyi- high blood pressure. Bahlukanise lesi sifo ngokwezigaba njengoba bethi lena ephakathi kuka-130-139 iyi- hypertention stage 1 kuthi engaphezulu kuka-140 ibe wu- stage 2.
Izifo ezihlasela umuntu onehypertention kubalwa esenhliziyo, esezinso, wukuqina kwama- arteriole, wukonakala kwamehlo nohlangothi ( stroke). Ngokusho kwemedicinenet. com, lesi sifo sihlasela abantu abaningi ikakhulukazi abadala.
Kuthiwa-ke kubalulekile ukuba uphuthume esibhedlela uma umfutho wegazi lakho ushaya ngaphezulu kuka-180/110, ikakhulukazi uma unezimpawu okubalwa kuzona izinhlungu ezisesifubeni, ungakwazi ukuphefumula kahle, yikhanda elinkenkethayo, yisiyezi, yizinhlungu emgogodleni nezinhlungu esinyeni.
Uma uphezulu kodwa ungenazo izimpawu ezinjengalezi ezibaluliwe, kuthiwa kubalulekile ukuba uqale phansi umshini ohlola ngawo ngoba kungenzeka ukuthi kukhona okungalungile ngawo.
Yize abantu abaningi bengasinaki lesi sifo, kodwa kuthiwa siyingozi. Ukuba nomfutho wegazi ophezulu isikhathi eside, kungaholela ekubeni ugcine uhlaselwa yizifo ezinjengesenhliziyo, izinso nonhlangothi.