KUPHENDULEKE IMITHANDAZO BENIKELELWA NGEKILASI
UZWAKELE washeshe waphendulwa umthandazo kaMnu Mduduzi Kheswa, obenguthishanhloko waseYiboni Primary School, KwaMakhutha - oseqokwe kwesokuba yimenenja yesekethe yezemfundo kule ndawo - okhale ngokuminyana kwezingane eziwu75 kwaGrade 6 kulesi sikole ngoFebhruwari.
UMnu Kheswa ubekhala nje, bekuvakashe abakwaTransnet Port Terminal (TPT) behambisele izingane uxhaso lwezicathulo, beholwa yiChief Executive Officer (CEO) yakhona, uNkk Nozipho Sithole.
Ngeledlule uphendulekile umthandazo kaMnu Kheswa, abakwaTPT, ngokubambisana neFast World Industries neCity Late 2005 (okungosonkontileka) , banikela ngegumbi elisamahambanendlwana, elizosetshenziswa ngabafundi bakwaGrade 6, lihlale nothisha.
Lokhu kwenze ukuba uMnu Kheswa, obekhona kulo mcimbi wokwethulwa kwaleli gumbi, wehluleka wukuzibamba yinjabulo. “Lo mnikelo kakukhona nje ukuthi uyisidingo sabafundi nothisha, kodwa usinika nethemba lokuthi umoya wobuntu uyavunguza emphakathini. Sibonga kakhulu kwabakwaTransnet Port Terminals, abakwaFast World Suppliers nabakwaCity Late 2005 ngokufeza iphupho lethu lokuba sibe nelinye igumbi lokufundela,” kusho uMnu Kheswa.
I-Executive Manager for Supply Chain Management kwiTPT, uNkk Thandi Sabelo, ithe lolu xhaso lungenye yezinto eziningi asebezinikele emiphakathini selokhu kuqale u-2018.
“Lokhu kuwumphumela weTPT wokuqhuba imigomo yeTransnet yokweseka iNational Development Plan kahulumeni yokuxhasa nokuthuthukisa imiphakathi ebinci-
shwe amathuba phambili ngokuba sisebenze nabanye esibambisene nabo (osonkontileka),” kusho uNkk Sabelo.
Uthe eNingizimu Afrika kunezingqinamba eziningi ezikhungethe imiphakathi, okwenza ludingeke kakhulu uxhaso oluvela kosomabhizinisi.
“Sithokozile ngokuba iFast World Suppliers neCity Late 2005 balekelelile ukuze kuqinisekiswe ukuthi abafundi nothisha kulesi sikole bathola leli gumbi ebelidingeka kangaka ukuze phela umsebenzi wokufunda nokufundisa uqhubeke ngaphansi kwesimo esamukelekile,” kusho uNkk Sabelo.
I-TPT ibimatasatasa nase-Eastern Cape itakula umphakathi isebenzisana khona nezinkampani zosonkontileka okubalwa kuzona iLaphum’ ikwezi Transport.
Imigomo yeTransnet yokweseka iNational Development Plan...