Sisazoshuba kakhulu isimo sezimali komasipala bakuleli
Lo mbiko ukhombisa omasipala abenza kahle nalabo abenza kabi
KUNGASE kube nzima ukuhlinzeka umphakathi ngezidingo komasipala abawu-100 abakhulu baseNingizimu Afrika ngenxa yenkinga yemali.
Lokhu kuvezwe yiRatings Afrika embikweni wayo, iMunicipal Financial Sustainability Index, ngeledlule. Lo mbiko wale nhlangano ecubungula isimo somasipala abawu-100 bakuleli - ukhombisa omasipala abenza kahle nabenza kabi.
Umhlaziyi wakwaRatings Afrika, uMnu Leon Claassen, uthi kuzodingeka u-R22.4 billion kuhulumeni omkhulu ukutakula labo masipala. Lo mbiko uphuma nje, iPhalamende belisanda kuveza ukuthi kunomasipala abawu-10 abakweleta u-Eskom imali kagesi elinganiselwa ku-R10 billion.
Labo masipala yiMaluti A Phofung ekweleta u-R2.8 billion, yiMatjhabeng – R1.6-billion neNgwathe - R936-million (bobathathu ngabaseFree State); eMalahleni - R1.6-billion, Govan Mbeki - R517-million, Lekwa - R491million neThaba Chweu - R431million (bonke ngabaseMpumalanga); Emfuleni - R606-million (owaseGauteng); Ditsobotla - R293million neNaledi - R280-million (okungabaseNorth West).
Okushayisa ngovalo wukuthi umbiko uveza ukuthi nonyaka inqwaba yomasipala abakhulu (ngokwezindawo zabo) basenkingeni enkulu yemali.
“Inkinga lapha iqala uma ibhajethi ingahlelwa kahle nemali ingasetshenziswa ngendlela efanele, lokho kugcina sekwenza izindleko zikamasipala ziqonge zidlule imali onayo,” kusho isitatimende seRatings Afrika.
Komasipala abawu-100, bawu-22 kuphela abasebenze kahle ngakwezemali, kanti abawu-78 kabenzanga kahle.
Uma behlangene laba abenze kahle, benze inzuzo ka-R1 billion kanti laba abawu-78 balahle u-R15.3 billion, ngokusho kweRatings Afrika. Komasipala abawu-8 abangama- metro, yiCape Town neTswane kuphela abenze inzuzo ka-R3.36 billion no-R730 million ngokwahlukana. Laba abanye abawu-6 balahle u-R5.14 billion behlanganisiwe.Ngokwezifundazwe, iWestern Cape - ephethwe yiDemocratic Alliance (DA), iqhubekile nokuzihola selokhu igudluze iKwaZulu-Natal eqhulwini ngo-2016/17.
IWestern Cape ithole amaphuzu awu-62 kanti iKwaZulu-Natal ithole awu-54. IFree State yiyona ebambe ibhuleki ngamaphuzu awu-19, okuyindawo eqale ukuhlala kuyona kusukela ngo2013/14.
Sezizonke izifundazwe ngokwamaphuzu, zimi kanje: iWestern Cape - 62, KwaZulu-Natal 54, Limpopo - 42, Northern Cape - 40, Eastern Cape - 36, Gauteng - 30, Mpumalanga - 28, Northern West - 23, Free State - 19.
NgokweRatings Afrika, ngisho nomasipala abenze kahle kulo nyaka, bathande ukwehlelwa yizinga njengoba bebathathu kuphela abathole amaphuzu angaphezu kuka-80 uma kuqhathisa nabawu-9 abawathole ngo2012. UMasipala waseMossel Bay nowaseSwartland - okungabaseWestern Cape - bathola amaphuzu awu-84.
Ngokwezifundazwe, naba omasipala abenganzanga neze kahle; e-Eastern Cape - Inxuba yeThemba (eCradock) = 14, eFree State - Matjhabeng (eWelkom) = 9, eGauteng - Emfuleni (Vereeniging) = 17, KwaZulu-Natal - Newcastle = 21, eLimpopo - iModimolle (Nylstroom) = 9, eMpumalanga - iLekwa (eStanderton) = 9, eNorthern Cape - Gamagara (Kathu) = 24, North West - Madibeng (eBrits) = 6, eWestern Cape - Kannaland (eLadismith) = 25.
Abenze kahle; e-Eastern Cape - Senqu (eLady Grey) = 79, eFree State - Metsimaholo (eSasolburg) = 33, eGauteng - Midvaal (Meyerton) = 68, KwaZulu-Natal - Greater Kokstad = 76, eLimpopo - Fetakgomo Tubase (Burgerfort) = 61, eMpumanalanga - Steve Tshwete (Middleburg) = 77, Northern Cape - Sol Plaatje (Kimberly) = 78, eNorth West - JB Marks (Potchestroom) = 57, eWestern Cape Mossel Bay neSwarland = 84.
ITheku okuwumasipala owumgogodla weKwaZulu-Natal, lithole amaphuzu awu-54 uma kuqhathaniswa nawu-64 eliwathole ekuklelisweni okwedlule kwango-2016. “Ngenxa yesimo esibi semali komasipala abawumgogodla eNiningizimu Afrika, sibona ukuthi ukuthunyelwa kwezidingo emphakathini kuzothanda ukuba nezinkinga.
Njengamanje omasipala babhekene nenkinga enkulu yemali. Ukulungisa lesi simo kuzodinga ubuholi bezepolitiki obuqotho, obunendaba nomphakathi hhayi izisu zabo. Ubuholi obukhona njengamanje komasipala abaningi, bukhombise kusukela eminyakeni engaphezu kwewu-5 edlule ukuthi kabunalo uholo oluqotho. Yisona sizathu-ke lesi esiholele ekubeni omasipala babhekane nenkinga yemali eNingizimu Afrika,” kusho isitatimende seRating Afrika.
Umthombo ngabe: Business Tech; Moneyweb.co.za; Ratings Afrika