Impilo ephilwa kuleli isengcono kunamanye amazwe
UMA ulalele abantu baseNingiziumu Afrika, ikakhulukazi abampisholo, bexoxa ngezisematheni nezingqinamba ababhekene nazo, ungafunga ugomele ukuthi leli ngelinye lamazwe anezinkinga ezinkulu ukwedlula ezamanye amazwe asathuthuka.
Eqinisweni isimo kasisibi njengoba abanye bethu becabanga, yingakho izinkulungwane ngezinkulungwane zabantu eziqhamuka kwamanye amazwe ase-Afrika nase-Asia, zithutheleka kuleli mihla le, zizozibhekela amadlelo aluhlaza.
Emazweni angaphezu kuka-50 e-Afrika, cishe yiBotswana, iMauritius naleli lakithi kuphela anokuthula, inqubo yombuso wentando yeningi, izinkantolo ezingachemile ngokombusazwe, imithombo yezindaba ekhululekile, nengqalasizinda yezomnotho esesimeni esingesibi.
Kuyiqiniso khona ukuthi ukwe- sweleka kwemisebenzi, ububha, wukungalingani kwamathuba ezomnotho phakathi kwabamnyama, abamhlophe nabomdabu baseNdiya, kuyizinkinga ezidinga ukulungiswa ngokushesha.
Noma kunjalo, abampisholo kuleli baphila impilo engcono kakhulu kunephilwa ngozakwethu eZimbabwe, eNigeria, eSomalia, eMozambique nakwamanye amazwe amaningi aleli zwekazi lethu.
Izakhamizi zamazwe ase-Asia okubalwa i-India, iPakistan neBengladash, zibona leli njengezwe elinoju lwezinyosi, yingakho zithutheleka kuleli zizobheka amathuba ezomnotho angcono, kunasemazweni ezidabuka kuwona.
Uma isimo singesibi kangako, pho kungani kunemibhikisho nokungeneliseki ngesimo esikhona ezweni? Ingxenye yokunye okudala lesi simo, ilele ekutheni abampisholo babona ozakwabo abamhlophe bephila kangcono kunabo, okuyimiphumela enomsuka esikhathini sobandlululo, lapho uhulumeni wawubhekelela izidingo zabo kakhulu, usebenzisa imali eningi ukukhuphula izinga labo lempilo, kodwa ungakwenzi okufanayo ukwenelisa izidingo zabampisholo.
Emuva kweminyaka ewu-24 yenkululeko, abampisholo sebeyahluleka wukubekezela, belinde ukuba uhulumeni uguqule isimo somnotho, kuthi izinga labo lempilo lifane nelozakwabo abamhlophe.
Iqiniso kodwa wukuthi ngeke lokhu kwenzeke uma abampisholo behlale bebheke kuhulumeni ukuba udale amathuba, bona bebe begoqe izandla, bebheke ukufunzwa.
Enye yezinkinga ezinkulu edondisa ukuthuthuka kwezomnotho kwabampisholo, wukugxi- la kakhulu kwabaningi bethu ekufukulweni wuhulumeni. Sikhulu kakhulu isibalo sabamnyama abafuna ukuba ngosopolitiki, ukuthola amathenda kuhulumeni nokuvulelwa amasango aya empumelelweni wuhulumeni, kunokugxila ekuzithuthukiseni ngemfundo nokusebenza kanzima baziqalele amabhizinisi abo angancikile kuhulumeni.
Siyokhula kwezomnotho mhla safunda ukubambisana njengabantu abansundu, sisebenze ngokuzikhandla, sisebenzisa amandla esinawo njengeningi ezweni lethu ukuzithuthukisa thina uqobo, singahlale sikhangeze kuhulumeni.
Siyokhula mhla sapheza ukubona ukuba yikhansela kumasipala, yilungu lePhalamende nokuthola ithenda yezigidi zemali kuhulumeni njengendlela elula yokuzinothisa. Ngeke zilunge izinto ezweni nxa iningi lentsha yethu libona ukungena kwipolitiki njengomsebenzi ophambili, lishaye indiva imfundo, ukuzisebenza noku-ziqalela amabhiziniso ayo.
Sinenhlanhla engandele bani ukuthi uMvelinqangi wasibusisa ngezwe elihle futhi elinothile.
Esifanele wukukwenza manje wukufinqa imikhono, sizibambele thina, siyeke ukubheka emehlweni osopolitiki njengoMesiya abayosikhipha ebugqilini bokweswela.
Kufanele sipheze ukuhlale sikhononda, sigxeka uhulumeni nabezimboni ezizimele ngokuthi kabasenzeli lutho. Kufanele sifunde ukuzinuka thina amakhwapha ukuze siphumelele emikhakheni eyahlukene yempilo, kuhlanganisa lapha nezomnotho.
UMgwaba, unguMhleli omkhulu weLANGA