Uyinyama umqeqeshi oqophe umlando kwiPSL
Izikhulu zeFree State Stars zibambe umoya ngo-Eymael
SIBAMBE umoya isikhulu seFree State Stars uRansie Mokoena ngomqeqeshi waso njengoba kuvela ukuthi sekungenelele namanye amakilabhu angaphandle kwakuleli amfunayo.
ULuc Eymael ( osesithombeni) opheka iStars uqophe umlando eba ngumqeqeshi wokuqala waseBelgium, ukunqoba iNedbank Cup abaguqise kowamanqamu wayo iMaritzburg United ngo-1-0 ngoMgqibelo kusihlwa eCape Town Stadium. Nokho ziya ngokuqina izinsolo zokuthi angase ayishiye le kilabhu njengoba kunamakilabhu amfunayo.
Emakilabhini amfunayo kubalwa iSuperSport United, kanti neKaizer Chiefs ibibalwa. Kuvela ukuthi kunamanye amakilabhu ase-Egypt asengenelele nawo amfunayo.
URansie uthi banovalo njengoba lo mqeqeshi esephenduke inyama.
“Kuyiqiniso ukuthi kunenqwaba yamakilabhu amfunayo kodwa uyalwazi udaba, unenkontileka nekilabhu. Kodwa-ke ngeke umvimbe umuntu uma efuna ukuha- mba, ngeke wenze lutho. Ngihlalele ethembeni lokuthi uzoqhubeka nokwenza umsebenzi awuqashelwe yikilabhu,” kusho uMokoena.
Uthi konke abakwenzile bekuyindlela yokubonga kusihlalo wekilabhu, uMike Mokoena.
“Injabulo esiyizwayo ayichazeki, yisikhathi esimnandi lesi ekilabhini. Kodwa-ke inhloso yethu enkulu bekuwukubuyisa isithunzi bese sijabulisa nosihlalo wekilabhu.
"Usihlalo wethu uyasabela uma sinezinkinga, angene ephaketheni lakhe asisize.
“Kubalandeli bethu siyabonga kakhulu ngokusethemba yize kuke kwaba nezimo ezinzima ezicishe zasiphoqa ukuba sidayise ikilabhu. Abadlali bayazi ukuthi imali isazogcwala amaphakethe, vele beze kulo mdlalo igcwele,” kusho uMokoena.