UMIKE MOKOENA USEYISHIYA EMADODANENI I-FREE STATE STARS
UMNIKAZI weFree State Stars uMike Mokoena uphonsela inselelo amadodana akhe amabili njengoba ewanika ikilabhu kwazise yena usethatha umhlalaphansi ekuholeni le kilabhu.
IStars ibe yizingqwele zeNedbank Cup iguqisa iMaritzburg United ngo-1-0 wegoli likaGoodman “Deco” Dlamini kowamanqamu walo mqhudelwano ngoMgqibelo kusihlwa eCape Town Stadium.
UMokoena umemezele ngokusemthethweni emuva kwalo mdlalo ukuthi usephuma unomphela ekuholeni le kilabhu, ushiya amadodana akhe uRansie Mokoena oyimenenja jikelele noKhotso Mokoena oyimenenja. UMokoena ekhuluma naleli phephandaba izolo ngeSonto ekuseni, esazwakala ukuthi ugcwele injabulo, uphonsele inselelo amadodana akhe.
“Sishiye kukhalwa eNatal, sanqoba ngegoli elilodwa lompetha. Kodwa-ke sengiyaphuma manje ebholeni. Ngikhathele, konke ngi- kushiyela kuRansie noKhotso ukuba baqhubeke bahole ikilabhu. Ngilenzile elami igama ebholeni, ngiyaphuma manje, ngiyozihlalela nesalukazi sami sibheke amabhizinisi ethu.
“Kufanele bazame ukukwazi ukulawula ibhajethi ngoba ngeke ngisabasiza ngalutho. Le nto yabo yokulokhu bezokhala kimina bethi bayashodelwa kufanele iphele. Umthwalo usemahlombe abo manje abaphume bayofuna abaxhasi ikilabhu ilakhile igama ngokunqoba le nkomishi,” kusho uMokoena obebuye akhulume nabanye abantu eceleni kwazise ubesesikhumulweni sezindiza eCape Town.
Uthi imjabulisile indlela aphuma ngayo ebholeni.
“Ngesikhathi ngithatha umhlalaphansi ukusebenzela iPremier Soccer League, inhloso yami bekuwukuyobhekana ngqo nemisebenzi yekilabhu yami. Le nkomishi bengazi ukuthi sizoyinqoba ngoba ngisebenzile. Ngibafisela inhlanhla bonke abakwiFree State Stars abaqhubeke kahle nomsebenzi,” kuphetha uMokoena.