ITHEMBA LOKUBUYA KWI-COSMOS
KULOKOZA inhlansi yethemba ngokunyukela kwi-Absa Premiership ku-Ephraim “Jomo” Sono ongumnikazi futhi ongumqeqeshi weJomo Cosmos eyivule ngenothi eliphansi imidlalo yokuhlungela ukungena esigabeni esikhulu ibambana neBlack Leopards ngo-2-2 izolo ngeSonto ntambama eVosloorus Stadium, eGoli.
ICosmos ibilokhu ilandela ngemuva kulo mdlalo njengoba inkundla ivulwe nguMwape Musonda ngomzuzu ka-12 wabuye wabhakuzisa elesibili ngoka-61, kwathi aweZenkosi avalelwa nguIshmail Mgunda ngoka-17 noThato Lingwati ongukaputeni ngesikhathi somusa kanondweba uVictor Gomes.
Ekhuluma emuva kwalo mdlalo uJomo, uthe unethemba lokuthi bazokwazi ukuqoqa amaphuzu agcwele uma sebebhekene nePlatinum Stars ngoLwesithathu ngo15h00 eRoyal Bafokeng Stadium. ILeopards iqhwakele ngamaphuzu amane emidlalweni emibili, iCosmos iyisibili ngephuzu emdlalweni owodwa kuthi iPlatinum ibambe ibhuleki ngeqanda emdlalweni owodwa.
ICosmos izokuya emdlalweni wePlatinum ngaphandle kukaLingwati noMduduzi Sibeko abathole amakhadi aphuzi.
“Kangikhathazekile njengoba kunabadlali abazokube bengekho emdlalweni nePlatinum kwazise nginesikwati esikhulu futhi esiqinile. Nginelikhulu iqholo lokuthi sizoyinqoba iPlatinum,” kusho uJomo.
UJoel Masutha opheka iLeopards, ukhale ngamaphutha enziwe ngabadlali bakhe ikakhulukazi emuva. Nokho uthi weneme ngendlela abasayibambe ngayo kule midlalo. Kulo mdlalo uMusonda uqokwe njengomdlali wosuku.
AmaJita (SA U/20) ahlule iMozambique ngo-3-0 emdlalweni wokuhlungela i-Africa Cup of Nations (Afcon) obuyizolo eMoruleng Stadium.
AmaJita anqobe ngo-4-1 uma sekuhlanganiswa namagoli omlenze wokuqala. Amagoli kowayizolo ashaywe nguWiseman Meyiwa noLyle Foster amabili.