KUBOSHELWE INGWE NENGONYAMA KWI-GROUP B
NAMUHLA sibheka ubuthaka nokuqina kwamazwe adidiyelwe kwiGroup B obalwa njengelinye lamaqoqo anzima emidlalweni yeNdebe yoMhlaba eqala mhla ka-14 kuNhlangulanga (June) isongwe mhla ka-15 kuNtulikazi (July) kophezulu, eRussia. Kuleli qoqo kukhona iPortugal, iSpain, iMorocco ne-Iran: IPortugal kulindeleke ukuba igile izimanga njengoba idle ubhedu kwi-Euro 16 ngemuva kokuhlula iFrance ngo-1-0 kowamanqamu khona eFrance. Lokhu kuyenza ibalwe nezimfivilithi ukunqoba lo mqhudelwano njengoba izwe elijwayele ukwenza kahle kwi-Euro liyaye lenze okufanayo nakwiNdebe yoMhlaba.
IPortugal isimemezele ngoLwesine isikwati sabadlali ezogadla ngaso kulo mqhudelwano. Okugqamile wukuthi kusale abadlali abangu-10 abebeyingxenye yesikwati esinqobe i-Euro. Phakathi kwabo kubalwa u-Elder ovalele igoli abanqobe ngalo lo mqhudelwano, u-Andre Gomes oshaye elinye lamagoli iBarcelona yaseSpain inenebula iMamelodi Sundowns ngeledlule, uRenato Sanches, uNani, u-Eliseu ukubala nje abambalwa. Nakulo nyaka isagabe ngoCristiano “CR7” Ronaldo ogijima kwiReal Madrid yaseSpain. Lo mdlali yize ezenzela umathanda ezingeni lamakilabhu, kodwa ubenebhadi lokungazinqobi izinkomishi nezwe lakhe angukaputeni walo. Uze waphungula umthwalo ngokunqoba i-Euro 2016 yize esheshe walimala kowamanqamu, okwenze wayosiza umqeqeshi ebhentshini.
Ubungafunga ukuthi nguyena umqeqeshi oyinhloko esikwatini kowamanqamu ngendlela abetatazela ngakhona. IPortugal idlale kangcono kakhulu kwiNdebe yoMhlaba yango-2014 eBrazil kunango-2010 lapha eNingizimu Afrika. URonaldo uzofika ethelwe ngezibonkolo kwiNdebe yoMhlaba uma nje engakwazi ukunqoba i-Uefa Champions League iMadrid ezobhekana neLiverpool kowamanqamu wayo ngoMgqibelo eKiev, e-Ukraine.
IPortugal ilolongwa nguFernando Santos, kanti iteketiswa ngeleSelection of the Quinas.
Sesisonke isikwati sabadlali abangu-23 sePortugal sididiyelwe kanje, onozinti: Anthony Lopes, Beto noRui Patricio.
Izitobha: Bruno Alves Cedric Soares, Jose Fonte, Mario Rui, Pepe, Raphael Guerreiro, Ricardo Pereira noRuben Dias.
Abasesiswini: Adrien Silva, Bruno Fernandes, Joao Mario, Joao Moutinho, Manuel Fernandes noWilliam Carvalho.
Abagadli: Andre Silva, Bernardo Silva, Cristiano Ronaldo, Gelson Martins, Goncalo Guedes noRicardo Quaresma. ISpain izoqala amalungiselelo eNdebe yoMhlaba mhla ka-28 kwephezulu ngaphandle kwezilomo zeReal Madrid eqhathwe neLiverpool yase-England kowamanqamu we-Uefa Champions League ngoMgqibelo eKiev, e-Ukraine.
ISpain inqume ukulungiselela lo mqhudelwano kulona leliya lizwe njengoba izosuka mhla ka-7 kuNhlangulana isibheke eKrasnodar, eRussia, okuyilapho izokube izinze khona. ISpain izodlala umdlalo wokugcina wobungani neTunisia, kanti kowandulela lowo izozwana amandla neSwitzerland.
ISpain ingelinye lamazwe abhekwe ukubuyisa isithunzi kulo mqhudelwano njengoba idle ibhedu ngo-2010 eNingizimu Afrika. Ihlule kunzima iNetherlands ngo-1-0 eFNB Stadium, ebibizwa ngeSoccer City ngesikhathi salo mqhudelwano.
Leli lizwe seligabe ngoJulen Lopetegui ongumqeqeshi ongene ezicathulweni zikaVicente Del Bosque. UJulen ufike noguquko olunzima kulesi sikwati njengoba eshintshe uhlelo lokudlala lwe-4-33 wethula olusha lwe-4-5-1. Nokhoke iSpain ejwayele ukubamba iqhaza kwiNdebe yoMhlaba, izalelwe yinja endlini njengoba ivula le midlalo nePortugal eyizingqwele zase-Europe. Umdlalo walezi zinkunzi uzokuba mhla ka-15 kuNhlangulana.
Leli lizwe kulindeleke lukhulu kulona njengoba lidume ngokusebenzisa abadlali abadlala kwiSpanish La Liga, iningi labo elidlala kwiMadrid nakwiBarcelona.
Ukwenza kahle kwamakilabhu aseSpain e-Europe, kuvamise ukukapakela naseqenjini lesizwe okwenza libhubhise kwasani ephambi kwalo. Isikwati seSpain esiya kwiNdebe yoMhlaba sizomenyezelwa namuhla ngoMsombuluko kwazise iLa Liga ibisongwa izolo ngeSonto. Leli lizwe liteketiswa ngele-La Furia Roja. IMorocco ingelinye lamazwe athwele amathemba e-Afrika kulo mqhudelwano. Izinga leMorocco kalikhalisi kangako njengoba emidlalweni yokuhlungela iNdebe yoMhlaba ingangenelwanga ngisho yigoli elilodwa, okuyizinkomba zokuba wukhonkolo emuva. IMorocco nasemidlalweni yobungani yakamuva yenze kahle njengoba ihlule iSerbia ngo-2-1 neUzbekistan ngo-2-0. IMorocco mancane amathuba okudlulela esigabeni esilandelayo kulo mqhudelwano njengoba iseqoqweni elibophele izinkunzi zaseEurope.
Okunye okwenza abe mfiliba amathuba eMorocco wukuthi kayinayo inhlanhla yokulunguza kulo mqhudelwano njengoba igcine ukubamba iqhaza kuwona ngo1998 eFrance. Nokho-ke izinto zishintshile manje njengoba isigabe ngenqwaba yabadlali abagiji- ma e-Europe.
Yize ilolongwa nguHerve Renard waseFrance, ohlonishwayo ebholeni lase-Afrika, kodwa kubukeka kukuncane azoqhamuka nakho njengoba engenamlando otheni ezingeni lomhlaba. Lo mqeqeshi uselolonge amazwe amaningi ase-Afrika, kanti uqhube iZambia ne-Ivory Coast benqoba i-African Cup of Nations (Afcon) ngokwahlukana.
IMorocco iteketiswa ngele-Atlas Lions.
Isikwati esisazohlungwa seMorocco sididiyelwe kanje, onozinti: Mounir El Kajoui, Yassine Bounou no-Ahmad Reda Tagnaouti.
Izitobha: Mehdi Benatia, Romain Saiss, Manuel Da Costa, Badr Benoun, Nabil Dirar, Achraf Hakimi noHamza Mendyl.
Abasesiswini: M’bark Boussoufa, Karim El Ahmadi, Youssef Ait Bennasser , Sofyan Amrabat, Younes Belhanda, Faycal Fajr noAmine Harit.
Abagadli: Khalid Boutaib, Aziz Bouhaddouz, Ayoub El Kaabi, Nordin Amrabat, Mehdi Carcela noHakim Ziyech. Leli lizwe likhombisa ukudlondlobala selokhu izintambo zokuqeqesha zibanjwe nguCarlos Queiroz. Lo mqeqeshi uphenduke inyama ngemuva kokuphendula i-Iran elinye lamazwe adlala ibhola elihle emhlabeni. Nokho-ke i-Iran incamele ukuhlukana nemali eshisi- we uku- mgcina.
Lokhu kuthele izithelo njengoba i-Iran iphothule imidlalo yokuhlungela iNdebe yoMhlaba ingayazi nhlobo induku. I-Iran kayikehlulwa emidlalweni engu-10 yokugcina. I-Iran igabe ngokuba nomqeqeshi osezingeni lomhlaba njengoba esefake amazwe ehluke- ne kwiNdebe yoMhlaba kubalwa iNingizimu Afrika, iPortugal nayo i-Iran.
Nokho-ke kubukeka izozalelwa yinja endlini njengoba iboshelwe eqoqweni elinamazwe anzima kakhulu. Amathemba e-Iran akuSardar Azmoun.
I-Iran iteketiswa ngele-The Cheetahs.
Isikwati esisazohlungwa se-Iran sididiyelwe kanje, onozinti: Alireza Beiranvand, Seyed Hossein Hosseini, Rashid Mazaheri noAmir Abedzadeh.
Izitobha: Ramin Rezaeian, Voria Ghafouri, Steven Beitashour, Seyed Jalal Hosseini, Mohammad Reza Khanzadeh, Morteza Pouraliganji, Mohammad Ansari, Pejman Montazeri noSeyed Majid Hosseini, Milad Mohammadi, Omid Norafkan, Saeid Aghaei noRoozbeh Cheshmi.
Abasesiswini: Saeid Ezatolahi, Masoud Shojaei, Ahmad Abdolahzadeh, Saman Ghoddos, Mahdi Torabi, Ashkan Dejagah, Omid Ebrahimi, Ehsan Hajsafi, Ali Karimi, Soroush Rafiei, Ali Gholizadeh noVahid Amiri .
Abagadli: Alireza Jahanbakhsh, Karim Ansarifard, Mahdi Taremi, Sardar Azmoun, Reza Ghoochannejhad noKaveh Rezaei.