KUQAQAMBA INHLIZIYO KOWE-PMB

KUQAQAMBA inhliziyo kuFarook “Ntshebe” Kadodia ongumnikazi weMaritzburg United njengoba ekholwa wukuthi ezakhe zibanjwe inkunzi kubuka izwe lonke kowamanqamu weNedbank Cup.

IMaritzburg iguqiswe yiFree State Stars ngo-1-0 wegoli likaGoodman “Deco” Dlamini kowamanqamu weNedbank Cup ngoMgqibelo kusihlwa eCape Town Stadium.

UKadodia ekhuluma neLANGA izolo ngeSonto ekuseni, uthe namanje isaqaqamba inhliziyo uma

ecabanga ngezinqumo ezenziwe ngunondweba, uVictor Hlungwani, obephethe umdlalo.

“Ngeke ngibasole ngalutho abadlali bami, bakwenze konke okusemandleni ukunqoba lo mdlalo yize iningi labo bengenaso isipiliyoni sokugijima kowamanqamu. Igoli esilidedelile kube yiphutha lethu, sibe budedengu emuva. Kodwa amaphenathi amabili unondweba angasinikanga wona abezokwenza omkhulu umehluko.

“Ibuhlungu inhliziyo yami ngale nto ngoba wonke umuntu ubonile ukuthi bekungamaphenathi acacile. Kodwa-ke ukukhala akusizi ngeke kusabuyela emuva okwenzekile kwenzekile,” kusho uKadodia obezwakala ukuthi uphatheke kabi.

Nokho uthi ngesizini ezayo bazimisele ngokuliqinisa iqembu.

“Kuzofanele sithole abadlali abane noma abahlanu ukuqinisa iqembu lethu.

Sidinga ukuqinisa ngabanye abanesipiliyoni ngoba yiyona into esishayile kulo mdlalo.

"Kodwa ngeke sithathe noma ngubani sizobhekisisa, sifuna abantu abazongena khaxa esitayeleni sethu sokudlala,” kusho uKadodia.

ISITHOMBE NGABE: GALLO IMAGES ABADLALI beFree State Stars bejabula nendebe yeNedbank abayinqobe ngokuguqisa iMaritzburg United ngo-1-0 ngoMgqibelo kusihlwa eCape Town Stadium.